Қытайда қазақ тілі мен әдебиеті байқауы өтті

Қытайда қазақ тіліне деген қызығушылық артып келеді. Кейінгі жылдары көрші елдің беделді жоғары оқу орындары біздің мемлекеттік тілге ерекше мән бере бастады.

Жергілікті жастар қазақ тілді меңгеріп тіпті мамандық ретінде таңдайтын болған. Бейжіңде осындай шетелдік студенттер мен мұғалімдер арасында халықаралық байқау ұйымдастырылды.

Қазақ тілі мен әдебиеті байқауы Қазақстанның Бейжіңдегі мәдениет орталығында өтті. Халықаралық сайыстың қатысушылары Жапония, Ресей, Таиланд, Оңтүстік Корея елдері мен Қытайдың бірнеше провинциясынан келді. Олар ережеге сәйкес алғашқы кезеңде өздерін қазақ тілінде таныстырды. Ал екінші бөлімде қазақ ақындарының шығармаларын жатқа оқыды. Ішінде қазақша анимациялық фильм дайындап келгендер де болды.

Чжу Сыи, байқауға қатысушы:

- Менің атым Айдана. Қазір тарих және шет тілдер университетінде қазақ тілі мамандығын оқып жатырмын.  Мен Абай шығармаларын оқуды жақсы көремін. Мысалы,  «Жасымда ғылым бар деп ескермедім».

Жастармен бірге 63 жастағы қытайлық зейнеткер де сайысқа түсті. Лю Сяолан Ланчжоу қаласынан келген. Ол Қазақстанның әнұранын жатқа орындап көрермендердің зор қошеметіне бөленді.

Лю Сяолан, байқауға қатысушы:

- Мен қазақ тілін үйренуді бірнеше жыл бұрын бастадым. Қазақ тілін үйренуге арналған оқулықтарды сатып алып, өзімше үйрендім. Бұрын мен сіздердің мемлекеттік әнұранды естігенмін. Одан да басқа әндерді тыңдағанмын. Қайта-қайта тыңдап жүріп жаттап алдым.

Үшінші кезең сұрақ-жауап түрінде өтті. Қатысушыларға Қазақстанның тарихы, мәдениеті мен салт-дәстүрлеріне байланысты сауалдар қойылып, шапшаң, әрі дұрыс жауап бергендер үздік атанды.

Қаламқас Серікқызы, ҚР Қытайдағы Төтенше және өкілетті елшісінің кеңесшісі:

- Таңдау өте қиын болып жатыр. Жалпы бізге ұнағаны қазақ тіліне деген басқа да қытайлық, жапондық, корей, ресейлік студенттер болсын қызығушылық танытып қатысуының өзі біз үшін ерекше әсер беріп отыр.

Қазылар алқасы жеңісті Далянь университетінің студентіне берді. Ол сұрақтарға сауатты жауап беріп, қазақтың эстрадалық әнін нақышқа келтіріп орындағаны үшін жоғары ұпайға ие болды. Оның қазақ тіліне деген қызығушылығын әнші Димаш Құдайбергеннің өнері тудырған.

Гуань Хаонан, байқау жеңімпазы:

- Сәлеметсіздер ме! Менің атым Гуань Хаонан. Қазақша атым Сержан. 21 жастамын. Қытай Халық Республикасының азаматымын. Оның өнері менің қазақ мәдениетін түсінуге деген әуесімді арттырды. Сондықтан да мен қазақ тілін үйренуді таңдадым.

Қытайдың тіл мамандары мен педагогтары арнайы келіп ерекше ықыласпен қатысты. Олардың айтуынша, дәл осындай іс-шаралар мемлекетаралық ынтымақтастықты арттырып, қарым-қатынасты нығайтуға ықпал етеді.

Си Вэйнин, Бейжің Шет тілдер университеті жанындағы Қазақстанды зерттеу орталығының жетекшісі:

- Адамды түсіну тек тіл арқылы ғой. Бұрын біз орысша сөйледік. Бір-бірін түсінді. Бірақ ең маңызды нәрсе бұл - мәдениет. Тек қазақ тілі арқылы Қазақстанның мәдениетін білу мүмкін. Сондықтан біздің ойымызша қазір Қытайда қазақ тілін үйренетін студенттер көбейді.

Иә, қазақ тілі біртіндеп Қытайда да трендтке айналып келеді. Оңтүстік Корея мен Таиланд, қытайлар мен жапондар Абайдың өлеңдерін жаттап қазақша тіл сындыра бастады. Демек бұл шет елдерде қазақ тіліне деген қызығушылықтың  жоғары екенін көрсетсе керек.   

Авторлары: Руслан Бақытбекұлы, Мадияр Ерсайын