Қытайдағы қандасымыз қос елдің байланысын бекемдеп жүр

Қытайда қазақ жігіті жауапты қызметке тағайыналды. Қазір атыраулық Руслан Төленов Хайнань провинициясында жұмыс істеп жүр.

Көрші елдің билігі оған халықаралық экономикалық байланысты дамыту ісін сеніп тапсырған. 

Руслан Төленов Қытайда 17 жылдан бері тұрады. Осында оқып, білім алған. Төрті тілді жетік меңгерген. Қазір Хайнань провинциясында халықаралық экономикалық даму бюросында департамент басшысының орынбасары болып жұмыс істейді. Инвестициялық байланысқа жауапты. Осы қызметтегі әлеуетін пайдаланып қазақ-қытай сауда-саттығы мен кәсіпкерлікті дамытуға үлес қосып жүр.

Руслан Төленов, Хайнань Халықаралық экономикалық даму бюросы департамент басшысының орынбасары:

- Қазақстанда осындай ашқымыз келеді немесе осындай проектілер бастағымыз келеді деп. Сондай жағдайда Қазақстандағы Қытай мекемелерін таныстырамын. Бірге Қазақстанның льготаларын таныстырамын. Біз сол Қытайдың компанияларына көмектесеміз. Қазір көп ұсыныс түсіп жатыр.

Руслан Қазақстан мен Қытай кәсіпкерлерінің бірлесіп әріптестік орнатуына талай рет мұрындық болдым дейді. Солардың бірі Санья қаласындағы отандық өнімдер павильоны. Мұнда елімізде шығарылатын тауарлардың ондаған түрі сатылып жатыр.

Руслан Төленов, Хайнань Халықаралық экономикалық даму бюросы департамент басшысының орынбасары:

- Қазақстанның тауарлары тікелей Хайнаньға әкеліп сатылып жатыр. Сұраныс бар. Тек қана оффлайн сату емес. Бірақ бұл мекеме өз коммерциялық платформасы бар. Біздің Қазақстанның тауарларын Қытайға онлайн да сатып жатыр. Бірақ көбінесе қажетті тауарлар ғой. Шоколад, құрғақ сүт, тағы басқа майлар.

Бүгінде қазақ-қытай арасында визасыз режим орнағалы тікелей әуе рейстері көбейді. Туристер саны да артқан. Қытай тарапының мәліметіне сәйкес, Хайнаньға жыл сайын 100 млн саяхатшы келсе, оның 75 мыңы Қазақстан азаматтары. Барыс-келіс жиілеген сайын қызмет көрсету саласында екі жақты бірлескен компаниялар да көбейген.

Хэ Цзинь, Қазақ-қытай бірлескен туристік компанияның жетекшісі:

- Қазақстан мен Хайнань арасында іскерлік сапарлар айтарлықтай өсті. Түрлі бағыт бойынша қызмет көрсеткендіктен біз талдау жасап отырамыз. Әсіресе Санья қаласына келушілер көп. Олар тек демалу үшін емес, жұмыс бабымен де келіп жатыр.

Қазақстан мен Қытай арасында экономикалық ынтымақтастық жылдан жылға нығайып келеді. Биыл сауда айналымы алғашқы 11 айда 43,8 млрд долларға жетті. Соның ішінде Қазақстанның Қытайға жалпы құны 17,3 млрд доллардың тауары экспортталған.

Авторлары: Руслан Бақытбекұлы, Мадияр Ерсайын