Қызметкерлерді жасанды интеллектпен ауыстырған компаниялар жетістікке жете алмайды

Quartz сайты жариялаған мақалада адамды ЖИ-мен ауыстыруға байланысты жаңа көзқарас айтылған. Aikyn.kz бизнес процестердегі адам мен машина арасындағы айырмашылықты талдайды.

2025 жылы америкалық Тулейн университетінде (The Tulane University) жүргізілген зерттеуде 250 қызметкер ChatGPT-ді жұмыс барысында қолдану деңгейі бойынша талданған. Нәтижесінде, ЖИ-ді белсенді әрі саналы түрде пайдаланған қызметкерлердің ғана өнімділігі артқаны анықталған. Олар ChatGPT-ді нақты мәселелерді шешу және жұмыс тиімділігін арттыру үшін ғана қолданған. Тулейн университетінің бизнес профессоры Шухуа Сан:

«ЖИ – қуатты құрал. Бірақ ақылды құралдың құндылығы оны адам тәжірибесімен қаншалықты үйлестіруге байланысты. Жұмыстың адами жағы – бейсаналық білім, контекст және пайым. Бұны машина қайталай алмайды. Егер компания ЖИ-ді адамды алмастырушы ретінде қарастырса, ол ортаңқол нәтижеге ұшырайды», – дейді.

Адамдар мен командалардың әлеуметтік және технологиялық жүйелерді қалай пайдаланатынын зерттейтін ұйымдық мінез-құлық сарапшысы профессор Сан «ЖИ шығармашылық қызметте адамды ауыстыра алмайтынын» айтады. Өйткені жасанды интеллект тәжірибесі мол, парасатты адамдар орындап келген дәстүрлі қызметтерді игере алмауда.

Еңбек нарығы сарапшыларының пікірінше, «артық автоматтандыру» компанияларды даралығынан айырады. Олардың өнімдері мен қызметтерін біркелкі, жансыз етеді.

«Артық автоматтандыру брендтерді ерекше ететін қасиеттерден айырады. Барлығы шаблонға айналады. Нәтижесінде стратегия мен терең ой болмайды».

Эндрюс «workslop» терминін мысалға келтіреді. Бұл ЖИ нәтижесінде алынған жалпылама әрі сапасыз контентті сипаттайтын сөз.

«ЖИ нәтижені тез шығара алады. Бірақ адамға тән нәзіктік пен эмпатияны, стратегиялық ойды бере алмайды», – дейді ол.

Moken.io компаниясының өнімдер бөлімінің жетекшісі Рори Боксер де осы пікірмен келіседі: «Бизнес ЖИ-ді шамадан тыс қолданған сайын, өз құрылымын жеңілдетіп, біртектес етіп жібереді. ЖИ болжам жасай алады, бірақ машинада адамға ғана тән креатив пен сана, түйсік жоқ». Оның айтуынша, адамды шешім қабылдау үдерісінен шығарып тастау – бизнесті тоқырауға апаратын ең қысқа жолы.

Жасанды интеллект еңбек өнімділігін арттыруға мүмкіндік берсе де, оны адамның орнын алмастыру құралы ретінде пайдалану қате болар еді. Біздің ойымызша, технологияны адамның шығармашылық әлеуетін кеңейтетін, жұмысын жеңілдететін көмекші ретінде қарағанда ғана мемлекет те, бизнес те шынайы инновация мен тұрақты дамуға жете алады. 

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.