Қызылорда облысының әлеуметтік саласын дамытуға арналған кеңес өтті

Қызылорда қаласында Премьер-Министрдің орынбасары – Мәдениет және ақпарат министрі Аида Балаеваның төрағалығымен өңірдің әлеуметтік саласын дамытуға арналған кеңес өтті.

Жиынға салалық министрліктердің өкілдері мен облыс басшылығы қатысты. Кеңесте әлеуметтік қызметтердің сапасын арттыру және бюджет қаражатының тиімді әрі ашық жұмсалуына қатаң бақылау орнату мәселелері көтерілді. Аида Балаева жергілікті атқарушы органдарға әлеуметтік саясатты іске асыруда нақты нәтижеге бағытталған жұмыс жүргізуді тапсырды.

Жиында Ғылым және жоғары білім министрі Саясат Нұрбек жоғары оқу орындары мен колледждерде кадр даярлау жүйесі жаңартылатынын мәлімдеді. Енді білім беру бағдарламалары еңбек нарығының нақты сұранысына сәйкес сауалнама деректері негізінде түзетілмек. Аида Балаеваның айтуынша, бұл тәсіл болашақта сұранысқа ие мамандарды анықтауға мүмкіндік береді. Қызылорда облысында осы бағытта жаңа мамандықтар атласы әзірленген. Өңір экономикасының негізгі салалары үшін білікті кадрлар даярлау мақсатында Премьер-Министрдің орынбасары – Мәдениет және ақпарат министрі облыс әкіміне білім беру гранттарының санын арттыруды тапсырды. Өңірде «Ауылда денсаулық сақтауды жаңғырту» ұлттық жобасы толық жүзеге асырылды. Жоба аясында 27 медициналық нысан бой көтерді. Премьер-Министрдің орынбасары емханалар қызметін жандандырудың маңызына тоқталды. Сондай-ақ саладағы бақылауды күшейтуді тапсырды. Кеңес барысында атаулы әлеуметтік көмектің тиімділігін арттыру мәселесі де қаралды. Өңірде әлеуметтік көмек алушылар саны айтарлықтай қысқарған. Осыған байланысты жәрдемақылардың тек шын мәнінде мұқтаж азаматтарға берілуіне басымдық беру қажеттігі сөз болды. Аида Балаева білім саласына да ерекше тоқталды. Айтуынша, мұғалімдердің біліктілігін арттыру және білім сапасын жақсарту бағытында кешенді шаралар қабылданып жатыр. Алдағы уақытта мектептерге жасанды интеллект технологияларын енгізуге айрықша мән беріледі. Бұл ретте жасанды интеллект мұғалімдерді алмастыру емес, керісінше, олардың жұмысын жеңілдететін көмекші құрал ретінде қолданылуға тиіс екені айтылды. Жиында туризм саласын дамытуға қатысты ұсыныстар да тыңдалды. Кейінгі кезде облысқа келетін туристер саны 35 пайыз артқан. Дегенмен, аймақтың тарихи-мәдени ескерткіштері мен киелі орындарын кеңінен насихаттау жұмыстарын күшейту қажет екенін атап өтті Аида Балаева. Сонымен қатар өңірдің мәдениет саласында да оң өзгерістер бар. Кейінгі үш жылда бұл салада 22 нысан жаңадан салынған. Оның ішінде барлық ауданда бірдей ашылған «Руханият орталықтарының» маңызы ерекше. Аталған орталықтар арқылы архив, кітапхана және музей қорлары толықтырылып, апатты жағдайдағы ғимараттар мәселесі түбегейлі шешімін тапқан. Кеңес қорытындысында Аида Балаева өңірдің әлеуметтік саласын одан әрі дамытуға бағытталған бірқатар нақты тапсырмалар берді. Сондай-ақ Қызылорда облысында барлық бағыт бойынша оң өзгерістер бар екенін атап өтті. 

Нұрлан Жақыпбеков, Ақан Әлиев, Нұржан Мұзарапшин