Референдум жоғары деңгейде ұйымдастырылған ТМД бақылаушылары

АСТАНА, 15 наурыз – Sputnik. Қазақстанда болған үш күнде Тәуелсіз Мемлекеттер Достастығы Парламентаралық Ассамблеясының халықаралық бақылаушылар тобы Қазақстан парламентінде де, бірқатар мемлекеттік органда да кездесулер өткізіп, ал бүгін бірнеше ондаған сайлау учаскесіне барды.

Бақылаушылар тобы референдум өткізілетін күні Қазақстанда ғана емес, шетелдегі бірқатар сайлау учаскесінде де жұмыс істейді. Бұл туралы ТМД Парламентаралық Ассамблея Кеңесінің Бас хатшысы Дмитрий Кобицкий Sputnik Қазақстан мультимедиялық баспасөз орталығындағы брифингте айтты.

"ТМД Парламентаралық Ассамблеясының халықаралық бақылаушылар құрамында 58 адам бар, оның ішінде 23 адам шетелдік сайлау учаскесінде жұмыс істейді. Өздеріңіз білетіндей, 54 мемлекетте 71 сайлау учаскесі ашылды. Сондықтан біз Қазақстан Республикасының ішінде болып жатқан оқиғаларға ғана емес, шетелде болып жатқан оқиғаларға да назар саламыз", - деді Кобицкий.

Оның айтуынша, референдум өткізуді тікелей бақылаудың алдында парламенттің екі палатасында да, мемлекеттік органдарда да топтың бірқатар кездесуі болған.

"Бірінші кезекте, Қазақстан парламентінің екі палатасының спикерлерімен кездесу болды. Сондай-ақ біз Конституциялық соттың төрағасымен, Жоғарғы сот төрағасының орынбасарымен кездестік, референдум жөніндегі Орталық сайлау комиссиясында кездесу болды. Барлық жерде бізге алдағы референдум, оны дайындау барысы, Конституцияның өзі қалай өзгеретіні туралы өте жақсы түсіндірілді және біз оларды мұқият тыңдадық", - деді Дмитрий Кобицкий.

Бүгін таңғы сағат 7-ден бастап бақылаушылар ондаған сайлау учаскесіне барды. Орталық сайлау комиссиясы учаскелік сайлау комиссияларының дайындық жұмыстары жоғары деңгейде болу үшін барлық шараны жасаған, деді бақылаушылар.

"Біз мұны Қазақстанда көп жыл бойы байқап келеміз. Парламентаралық Ассамблея 1994 жылдан бастап сайлауды бақылаумен айналысады. Біз алғашқы сайлауды Қазақстанда бақыладық. Сондықтан бізде бақылау тәжірибесі мол, соның ішінде Қазақстанда. Мен әрқашан сайлау учаскелеріне келетін халықтың өзін процеске қатысып қана қоймай, сонымен қатар жайлы сезінуі үшін барлық мүмкіндіктің ұйымдастырылғанын айтқым келеді", - деді Кобицкий.

Ол қазақстандықтардың шағын топтары мен сайлауға өз бетінше келе алмайтындарға деген қамқорлығын жоғары бағалады.

"Халықтың мобильділігі төмен топтары үшін қолжетімді жағдай қамтамасыз етілген. Егер біреу сайлау учаскесіне бара алмаса, міндетті түрде үйде дауыс беру ұйымдастырылады. Біз үйде дауыс беруге де бардық. Учаскелік сайлау комиссиясы мұның бәрін қалай ұйымдастыратынын көрдік. Сонымен қатар таңертеңгі сағат 7-ден бастап сайлау учаскелерінде көптеген дауыс берушілердің, әсіресе жастардың болғанына қуаныштымыз", - деді ТМД парламентаралық Ассамблеясының халықаралық бақылаушылар тобының басшысы.

Сонымен қатар ол сайлау учаскелеріне барғанда қандай да бір заң бұзушылықтарды байқамағанын айтты. Дмитрий Кобицкийдің айтуынша, олар қазақстандық үкіметтік емес ұйымдардың Ұлттық бақылаушыларымен де сөйлескен. Олар да заң бұзушылықтар тіркелмегенін айтқан.