Ресей мұнайын Қазақстанда қайта өңдеу мүмкіндігі талқылануда

Ресейдегі мұнай өңдеу зауыттарына жасалған шабуылдардан кейін шикі мұнайды Қазақстанға бағыттап, отандық МӨЗ-дерде қайта өңдеу мүмкіндігі қарастырылып жатыр.

Энергетика министрлігінің Reuters-ке хабарлауынша, өндірілген мұнай өнімдерінің бір бөлігі Ресейге қайта экспортталуы мүмкін, алайда басты басымдық Қазақстан ішкі нарығын қамтамасыз ету болып қала береді.

Министрлік мұндай схема қазақстандық мұнай өңдеу зауыттарының тұрақты жүктемесін сақтап, жұмыс орындарын қорғауға мүмкіндік беретінін түсіндірді. Қай зауыттар мен қандай көлемде мұнай қабылдайтыны әзірге жария етілмеген, коммерциялық параметрлерді нарық қатысушылары өздері анықтайды.

Reuters дерегіне сүйенсек, қазақстандық «Конденсат» зауыты қазірдің өзінде ресейлік мұнайды өңдеп жатыр. Шілде айында кәсіпорын алғаш рет Ресейге автокөлік бензинін экспорттаған. Сонымен бірге министрлік ресейлік авиаотынды Қазақстанға жеткізу қазақстандық бензинді экспорттаудың шарты емес екенін атап өтті.

Ресейдің отын нарығы жоспардан тыс жөндеулер мен дрон шабуылдарынан кейін тапшылыққа тап болды. Осыған байланысты Орталық Азия елдеріне жеткізілімдер қысқарды.

2026 жылға арналған индикативтік баланс аясында Ресей мен Қазақстан бажсыз жеткізілім көлемін келісіп қойды: 285 мың тонна бензин, 450 мың тонна дизель отыны және 300 мың тонна авиакеросин. Бұл көлемдер Қазақстан нарығын жоғары сұраныс пен зауыттардағы жөндеу кезеңінде қолдау үшін қарастырылған.

Бүгін, 19:19