Ресей Украина және АҚШ пен алғашқы үшжақты келіссөз өткізеді

Жақын арада Ресей делегациясы Украинамен келіссөздер жүргізу үшін Абу-Дабиге ұшып барамақ. Бұл туралы Ресей президентінің көмекшісі Юрий Ушаков Владимир Путин мен Дональд Трамптың өкілдері арасындағы кездесуден кейін мәлімдеді, деп хабарлайды Arasha.kz.

Ресей, АҚШ және Украинаның үшжақты жұмыс тобының алғашқы кездесуі 23 қаңтарда Абу-Дабиде өтеді. Бұл туралы Ресей президентінің көмекшісі Юрий Ушаков жұма күні таңертең өткен телефон брифингінде хабарлады. Ол Дональд Трамптың өкілдері мен Ресей президенті Владимир Путин арасындағы Украинадағы бейбіт реттеу мәселелеріне арналған келіссөздердің қорытындысын баяндады.

«Бүгін, яғни жұма, 23 қаңтарда Абу-Дабиде қауіпсіздік мәселелері бойынша үшжақты жұмыс тобының алғашқы отырысы өтеді деп келісілді», — деді Ушаков. Оның мәлімдемесінің жазбасы «ТАСС» ақпарат агенттігінің сайтында жарияланды.

Ресейлік делегация жасақталды және алдағы бірнеше сағатта Әмірліктерге аттанады. Делегация құрамында Ресей Қорғаныс министрлігі басшылығының өкілдері бар, оларды РФ Қарулы Күштері Бас штабы Бас басқармасының (2010 жылға дейін – ГРУ) бастығы, адмирал Игорь Костюков бастап барады.

Мәскеудегі АҚШ пен Ресейдің Украина бойынша кездесуі 23 қаңтарға қараған түні Кремльде жабық есік жағдайында өткен кездесуге америкалық тараптан АҚШ президентінің арнайы өкілі Стив Уиткофф, Ақ үйдің аға кеңесшісі Джош Грюнбаум және Дональд Трамптың күйеу баласы Джаред Кушнер қатысты.

2017 жылдан 2021 жылға дейін Трамптың аға кеңесшісі болған Кушнердің қазіргі уақытта АҚШ әкімшілігінде ресми лауазымы жоқ. Дегенмен, ол Трампқа ықпалын сақтап отыр және Ақ үйдің дипломатиялық әрі саяси бастамаларына белсенді қатысуда.

Ал Джош Грюнбаум — АҚШ-тың Жалпы қызметтер басқармасындағы Федералдық сатып алу қызметінің комиссары. Ол Трамп жаңадан құрған «Бейбітшілік кеңесінің» аға кеңесшісі болып тағайындалып, келіссөздерге алғаш рет қатысып отыр.

Ушаков: АҚШ-пен келіссөздер «өте мазмұнды» болды Кремльдегі кездесуге Ресей тарапынан Путин мен Ушаковтан бөлек, Ресей тікелей инвестициялар қорының (РФПИ) бас директоры Кирилл Дмитриев қатысты. Юрий Ушаковтың айтуынша, бұл келіссөздер төрт сағаттан астам уақытқа созылды және «айрықша мазмұнды, конструктивті әрі барынша ашық әрі сенімді жағдайда өтті».

Уиткофф пен Кушнер Давоста өткен байланыстарынан, соның ішінде Трамптың Зеленскиймен кездесуінен алған әсерлерімен бөлісті.

Сонымен қатар, Абу-Дабиде экономикалық мәселелер бойынша екіжақты (Ресей-Америка) топ басшылары Стив Уиткофф пен Кирилл Дмитриевтің кездесуі де өтетіні белгілі болды.