Ресей, Украина және АҚШ арасында жаңа үшжақты кездесу келесі аптада өтуі мүмкін

Politico басылымының дереккөзі бұл кездесуде америкалық делегация қақтығысты реттеу мәселесінде ілгерілеуге қол жеткізуге үміттенетінін айтады, деп хабарлайды Arasha.kz.

Келіссөздер бұған дейінгі екі кездесу өткен Абу-Даби қаласында немесе АҚШ-тағы Флорида штатында орналасқан Майами қаласында өтуі мүмкін. Бұған дейін жаңа кездесу АҚШ-та өтуі ықтимал екенін Владимир Зеленский айтқан.

Мәскеу жаңа келіссөздердің өтетін орны мен уақытын растаған жоқ. АҚШ та келіссөздердің нақты күні мен орнын ресми түрде жариялаған жоқ.

Алдыңғы үшжақты келіссөздер 4–5 ақпанда Абу-Дабиде өткен. Сол кезде Киев пен Мәскеу «157-ге 157» формуласы бойынша әскери тұтқындармен алмасуға келіскен. Кездесуге қатысушылар оның нәтижесін конструктивті деп атаған, алайда нақты нәтижелер жарияланбаған.

ТАСС агенттігі дереккөзіне сүйенсек, үш елдің өкілдері экономикалық мәселелерді, аумақтық тақырыптарды және атысты тоқтату тетіктерін талқылаған.