Ресейде теракт жасаушылардың 80% ы 35 жасқа дейінгі жастар

Бұл туралы Ресейдің Ұлттық антитеррорлық комитетінің ресми өкілі Андрей Пржездомский мәлімдеді.

Оның айтуынша, соңғы жылдары террористік әрекеттерге қатысушылардың жасы айтарлықтай жасарып кеткен.

– Террористік контингенттің «жасарып» бара жатқаны байқалады. Қазір мұндай қылмыстардың 80%-ы, тіпті одан да көбі 35 жасқа дейінгі адамдар тарапынан жасалады, – деді Андрей Пржездомский.

Ол алғаш рет мұндай жағдайды Хасавюртте байқағанын айтып, сол кезде ірі теракт ұйымдастыруға қатысы бар топтың жетекшісі ретінде 18 жастағы жас жігіттің ұсталғанын мысалға келтірді.

Пржездомскийдің сөзінше, қазіргі таңда мұндай жағдайлар сирек құбылыс емес, керісінше қалыпты үрдіске айналған.

Сондай-ақ ол жастарды террористік әрекеттерге тарту барысында олардың психологиялық және жас ерекшеліктері пайдаланылатынын атап өтті. Атап айтқанда, толық қалыптаспаған дүниетаным, құндылықтар жүйесі мен сыни ойлау қабілетінің әлсіздігі оларды қауіп-қатерді дер кезінде бағалаудан шектейді.

Айта кетейік, бұған дейін Ресейдің әскери шығыны 190 млрд долларға жеткені хабарланды.