Республика күні егемендік бастауы

Шымкентте де Республика күніне орайластырылған мерекелік шаралар басталды.

Бүгін салтанатты жиында шаһардың әлеуметтік-экономикалық және мәдени дамуына үлес қосқан азаматтарға мемлекеттік наградалар табысталды. Адал еңбеккерлердің арқасында мегаполис ұлттық мерекеге зор жетістікпен жетті.

Ұлттық мерекеде мемлекетіміздің қастерлі нышандарына айрықша құрмет көрсетілді. Сахна төріне көк туымыз шығарылып, әнұран шырқалды. Концерт залына қарапайым жұмысшыдан бастап, педагог, дәрігерлер, инженер, кәсіпкерлер жиналды. Өз міндеттерін адал атқарып жүрген осындай жандардың арқасында қала экономикасы өрледі.

Ғабит Сыздықбеков, қала әкімі:

- Соңғы үш жылда қалаға 2 триллион теңгеге жуық инвестиция тартылды. Бұл өндіріс пен құрылыс секторына да айтарлықтай серпін берді. Қаланың бюджеті алғаш рет 895 миллиард теңгеге жетіп, оның 50% әлеуметтік саланы қолдауға бағытталды.

Республика күнінде қалаға еңбегі сіңген азаматтар құрмет биігінен көрінді. Қоғам дамуына үлес қосқандарға «Парасат», «Құрмет», «Ерен еңбегі» мен «Шапағат» ордені табысталды.

Рәсілбек Естемісов, суретші:

- Әр художниктің өз почеркі болуы керек. Ол ешкімге ұқсамайды. Соны табу керек. Мен соны таптым. Бұл марапатқа мені педагог-мұғалімдер ұсынды. Бәріне көп рақметімді айтамын. 

Мерекелік жиынға қатысушылар жергілікті өнерпаздардың патриоттық қойылымдарын тамашалады. Ән тыңдап, күмбірлеген күйден ерекше әсер алды. 

Орынша Тәжібаева, қала тұрғыны:

- Қаламыз өте үлкейді. Мынау Қызғалдақ сарайымыз не тұрады!? Көшелерімізде, елді мекендерімізде ойын алаңшасы, аллеяларымыз бар. Ол деген керемет. Мәдениет үйлеріміз көбейді.

Халықтың еркіндігі мен бостандығының кепілі болған ұлттық мерекені қала жұртшылығы қуана тойлауда. Мәдени-патриоттық іс-шаралармен қоса ұлттық салт-дәстүрге негізделген театрландырылған қойылымдар, дәстүрлі ән шеру, әдеби шығармашылық кеш жоспарланған. 

Нұрсұлтан Мұхамеджан, Нұрмахан Мұсатов, Нұрмахан Бекмұратов