Республика күніне арналған жаңа музыкалық жоба: Özim тобының Ban клипі таныстырылды

Республика күні қарсаңында «Жаңа адамдар» қозғалысы қазақстандық қыздар бэнді Özim тобының дебюттік «Ban» атты клипін ұсынды. Бұл туынды қазіргі Қазақстандағы әйелдердің рөлі мен олардың қоғамдағы орнын жаңаша көрсететін музыкалық жоба болып табылады.

«Ban» — жаңа заманның символы, онда әйелдің еркіндігі, абыройы мен қауіпсіздігі тек мәдени деңгейде емес, заң жүзінде де қорғалуға тиіс деген идея көрініс тапқан.

Соңғы жылдары Президент Қасым-Жомарт Тоқаевтың бастамасымен елімізде әйелдердің құқықтарын қорғауға бағытталған маңызды заңнамалық өзгерістер енгізілді. Олардың қатарында отбасылық-тұрмыстық зорлық-зомбылық, сталкинг, неке қиюға мәжбүрлеу үшін жауапкершілікті күшейту шаралары бар. Бұл түзетулер — қоғамның әділдік пен жауапкершілікке ұмтылған терең әлеуметтік трансформациясының көрінісі.
Айта кетерлігі, Қазақстан Орталық Азия мен ТМД елдерінің ішінде алғаш болып неке қиюға мәжбүрлеуді қылмыс деп таныған мемлекет болды.

Özim тобының мүшелері өз жаңа туындысы туралы былай дейді:

«Ban — әйелдің қорғалуына, естілуіне және құрметке ие болуына арналған ән. Біз заңдары қоғамның сұранысын бейнелейтін елде өмір сүріп жатқанымызды мақтан етеміз».

Әннің музыкалық стилінде электронды әуен, этникалық сарын және рэп элементтері үйлесіп, заманауи қазақстандық әйелдің өзіндік көзқарасы бар, дербес әрі жігерлі бейнесін көрсетеді.

«Жаңа адамдар» қозғалысының өкілі Адалят Рахидинова жобаның идеялық мәнін былай түсіндірді:

«Бүгінгі қазақстандық әйел өз қауіпсіздігінің заңмен бекітілгенін мақтан ете алады. Бірақ одан да маңыздысы — қоғамда сыйластық пен жауапкершілік мәдениетін қалыптастыру. Біз осыны “Ban” клипі арқылы жеткізгіміз келді: музыканың тілімен жаңа құндылықтар мен ертеңге деген сенімділік жайында айттық».