Республикалық тас жолдарда электромобильдерді қуаттайтын 250 сервис станциясы салынады

АСТАНА, 22 маусым – Sputnik. Үкімет жол бойындағы сервис станцияларын салуға шамамен 180 млрд теңге инвестиция тарту жөніндегі жобаны мақұлдады.

Елімізде 250 жол бойындағы сервис станциясын салу жоспарланып отыр. Осы орайда көлік министрлігі мен "Car Park Transformer" ЖШС арасында жаңартылатын энергия көздерін пайдалана отырып, жол бойындағы сервис станцияларын салу жөніндегі инвестициялар туралы келісімді мақұлдады. Тиісті қаулыға премьер-министр қол қойды.

Жобаға тартылатын жеке инвестицияның жалпы көлемі 179,5 млрд теңгені құрайды.

"Аталған жоба халықаралық және республикалық маңызы бар автожолдар бойындағы қазіргі бар демалыс алаңдарында 2030 жылға дейін жол бойындағы 250 сервис станциясын салуды көздейді. Оның ішінде алғашқы 50 нысан биыл салынып, пайдалануға беріледі", - деп жазылған хабарламада.

Жаңа станциялар санитариялық-тұрмыстық үй-жайларды, сауда және қызмет көрсету пункттерін, электрлі көліктерге арналған қуаттау стансаларын, күн энергиясын өндіретін қондырғыларды қамтиды. Сонымен қатар жаңа станциялар іргелес аумақтарды абаттандыру және көгалдандыру жұмыстары жүргізілген заманауи көпфункционалды кешендер ретінде салынады.

Жобаны жүзеге асыру халықаралық стандарттарға сәйкес келетін жол бойындағы қызмет көрсету нысандары желісін кеңейтуге, электромобильдер үшін заманауи инфрақұрылым құруға және көлік саласында экологиялық бағдарланған шешімдерді енгізуге мүмкіндік береді.

"Сондай-ақ жол бойындағы сервис стансаларының құрылысы жақын маңдағы өңірлердің әлеуметтік инфрақұрылымын дамытуға серпін береді. Жоба аясында 2 мың жаңа жұмыс орны ашылады", - дейді үкіметте.

Айта кетері, бүгінде елімізде халықаралық және республикалық маңызы бар автожолдар бойында 1 428 сервис нысаны жұмыс істейді.