Республикалық жолдардағы 200 ден астам су шаю қаупі бар учаске министрлік бақылауында

АСТАНА, 13 наурыз – Sputnik. Республикалық жолдардағы 229 су шаю қаупі бар учаске көлік министрлігінің бақылауында, деп хабарлады ведомствоның баспасөз қызметі.

"Қазіргі уақытта республикалық автожолдарда жалпы ұзындығы 160 шақырымды құрайтын су шаю қаупі бар 229 учаске бақылауға алынған. Аталған учаскелерге 2252 техника бекітіліп, күнделікті мониторинг жүргізіліп жатыр", - деп жазылған хабарламада.

Алдын алу шараларын қабылдау мақсатында 40 мың шаршы метр бут тасы, 16 мың шаршы метр құм, 5 мың шаршы метр қиыршық тас және 23 мың шаршы метр құм-қиыршық тас қоспасы, сондай-ақ 280 мың қап дайындалды. Сонымен қатар, тасқын суды кедергісіз өткізу үшін су өткізгіш құбырларын тазарту жұмыстары жүргізіліп жатыр.

Су басу қаупі бар учаскелерде 2025 жылы 582 жаңа су өткізгіш құбыр орнатылды, ал 2026 жылы тағы 467 құбыр орнату жоспарланып отыр.

Қабылданып жатқан шаралардың нәтижесінде соңғы төрт жылда республикалық автожолдардағы су басу қаупі бар учаскелер саны 396-дан 229-ға азайды.

Теміржол желісінде жоспарлы түрде 290 вагоннан тұратын 45 пойыз жасақталды. Олар қажетті құрал-жабдықтармен, инертті материалдармен, бут тасымен және металл көпір құрылымдарымен қамтамасыз етілген.

Оңтүстік, Батыс және Шығыс өңірлерінде 2350 көпір, 4426 су өткізгіш құбыр, 1215 км кювет және 336,8 км таулы арықтар толық тазартылды. Бұл жоспарланған жұмыстың 100 пайызын құрайды. Солтүстік өңірде аталған нысандарды тазарту жұмыстары жоспарға сәйкес жалғасып жатыр.