Рим Папасы Таяу Шығыста атысты тоқтатып, диалог бастауға шақырды

Понтифик тиісті мәлімдемесін жексенбі, 8 наурыз күні Ватиканда жасады. Рим Папасы өңірден келіп жатқан ақпараттардың қатты алаңдататынын жеткізді.

Оның айтуынша, зорлық-зомбылық пен қорқыныш күшейген қазіргі жағдай қақтығыстың көрші елдерге таралу қаупін арттырып отыр.

Понтифик әсіресе Ливандағы жағдайға алаңдаушылық білдіріп, елдің қайтадан тұрақсыздық кезеңіне түсуі мүмкін екенін атап өтті.

— Бомбалардың гүрсілі тоқтап, қарудың үні өшіп, диалогқа жол ашылып, онда халықтың үні естілуі үшін Жаратқанға дұға етеміз, — деді Рим Папасы Лев XIV.

Өз үндеуінде Ватикан басшысы қақтығыс тараптарын татуласу мен үміт жолын таңдауға шақырды. Сондай-ақ халықаралық қауымдастықты шиеленісті бәсеңдетіп, адам шығынының одан әрі өсуіне жол бермеу үшін күш біріктіруге үндеді.

Понтификтің үндеуі өңірдегі қауіпсіздікті қамтамасыз етуге бағытталған халықаралық күш-жігер күшейіп, дағдарыс аймағынан шетел азаматтарын эвакуациялау басталған кезеңде жасалды.

Ал АҚШ президенті Дональд Трамп Иранға өте күшті соққы жасалатынын мәлімдеді.

28 ақпанда басталған әскери операция барысында АҚШ алғаш рет жаңа қару түрлерінің бірқатарын қолданған. Мәліметтерге қарағанда, Иранда 6668 азаматтық нысан АҚШ пен Израиль шабуылына ұшыраған.

Сондай-ақ Иранда жоғарғы жетекші Әли Хаменеидің қаза табуына байланысты билік транзиті рәсімі ресми түрде басталды. 8 наурыз күні Иранның Сарапшылар кеңесі жаңа жоғарғы көшбасшыны анықтағаны белгілі болды.