Сағызша созылған жөндеу: мердігер ісі сотта қаралып жатыр

Атырау қаласында Махамбет көшесі, 118 Д мекенжайы бойынша бұрын №2 қалалық сот орналасқан ғимаратта жүріп жатқан жөндеу жұмыстары ұзаққа созылды. Бұған не себеп? «АЖ» тілшісі осы және өзге де сауалдарға жауап іздеп көрді.

Қазіргі уақытта нысан қалалық тұрғын үй-коммуналдық шаруашылығы және тұрғын үй инспекциясы бөлімінің теңгерімінде.

Қала әкімінің орынбасары Тілек Махуов журналистік сауалға берген жауабында жөндеу жұмыстары 2025 жылдың қараша айында басталғанын мәлімдеді. Алайда, бұл мәлімет күмән тудырады. Себебі, аталған ғимаратта құрылыс жұмыстарының белгілері 2022 жылдың күзінде-ақ байқалған.

Сол кезеңде облыс әкімінің бұрынғы орынбасары Бақытгүл Хаменованың ісі осы ғимаратта қаралып жатқан еді. Сот процестерін жариялауға барған кезде журналистер бастапқыда ғимараттың алдыңғы есігі арқылы кірген. Кейінірек негізгі кіреберіс бұзылып, аула аумағында құрылыс жұмыстары басталған соң, тілшілерді артқы есікпен кіргізе бастаған.

Куә болған жағдайларға сәйкес, ғимараттың алдыңғы бөлігінде жер қазылып, қадалар қағу жұмыстары жүргізілген. Алайда қыс түскен соң құрылыс тоқтап қалған.

Тілек Махуовтың қолы қойылған ресми жауапта жөндеу жұмыстарының ұзаққа созылуына мердігер ұйымның міндеттемелерді тиісінше орындамауы себеп болғаны айтылған. Қазіргі уақытта бұл мәселеге байланысты сот процесі жүріп жатқаны да хабарланды.

Сонымен қатар, мердігер компания туралы мәлімет, жөндеу жұмыстарына бөлінген қаржының қай бюджеттен қарастырылғаны, ғимарат алдындағы қазба жұмыстары мен орнатылған металл конструкциялардың мақсаты, бұл аумақта қандай нысан салынатыны, құрылыстың не себепті тоқтап, кейін қайта жалғасқаны және нысанды пайдалануға беру мерзімі туралы сұрақтарға нақты жауап берілмеді.

Қала әкімдігі бұл ақпараттардың «Қызметтік пайдалануға арналған» (ДСП) санатына жататынын алға тартып, жария етуден бас тартты.

2022 жылы басталған құрылыс жұмыстарына қатысты қосымша ақпарат алу үшін біз қала әкімдігінің баспасөз хатшысы Еркеназ Қалижанға және жауапты дайындаған қалалық тұрғын үй-коммуналдық шаруашылығы және тұрғын үй инспекциясы бөлімі басшысының міндетін уақытша атқарушы Ақесен Ибрагимовке сауал жолдадық. А.Ибрагимов іссапарда екенін айтып, кейінірек ақпараттық анықтама беретінін жеткізді.

Айнұр САПАРОВА

Суретті түсірген автор

Бүгін, 09:14