Самокатшылар жаңа тыйымдардан шатасып кетті қазақстандықтардың негізгі сауалдарына жауаптар

Электрсамокат пайдалану ережелеріне енгізілген өзгерістерден кейін жеке көлік иелерінде көптеген сұрақ туындады: енді самокатты тіркеу, нөмір алу, сақтандыруды ресімдеу қажет пе және қала ішінде жүру кезінде қандай талаптар қолданылады. ІІМ 25 тамыздан бастап жеке электрсамокат иелеріне не өзгеретінін түсіндірді, деп хабарлайды Tengrinews.kz тілшісі.

Жеке электрсамокаттарды тіркеу

ІІМ мәліметінше, заңнамада жеке электрсамокаттарды мемлекеттік тіркеу қарастырылмаған. Самокат иелеріне: қажеті жоқ:

тіркеу; мемлекеттік нөмір алу; міндетті сақтандыруды ресімдеу. Қай жерде жүруге болады?

Электрсамокатты пайдаланушылардың барлығына қатысты басты өзгеріс 2026 жылғы 25 тамызда күшіне енеді. Осы күннен бастап электрсамокат жүргізушілеріне тротуарлар мен жаяу жүргіншілер аймақтарында қозғалуға тыйым салынады.

Жаңа ереже жеке электрсамокаттарға да, жалға берілетін самокаттарға да қатысты.

"Заңнама жеке мобильділік құралдарын меншік нысаны бойынша бөлмейді – талаптар барлық пайдаланушы үшін бірдей", - деді ІІМ.

Өзгерістер күшіне енгеннен кейін қозғалысқа келесі жерлерде рұқсат етіледі:

велосипед жолдарымен; велосипед жолақтарымен; олар болмаған жағдайда – жолдың жүру бөлігінің оң жақ жиегінде; Жол жүрісі қағидаларының талаптарын сақтай отырып, жол жиегімен.

Егер қозғалысты ереже бұзбай жалғастыру мүмкін болмаса немесе бұл жол қозғалысының басқа қатысушыларына қауіп төндірсе, жүргізуші самокаттан түсіп, жолын жаяу жалғастыруы тиіс.

Фото © Tengrinews.kz

Жолмен жүруге бола ма?

ІІМ мәліметінше, жолдың жүріс бөлігімен қозғалуға болады, бірақ белгілі бір шарттарды сақтау қажет. Ол үшін жүргізуші:

18 жастан асқан болуы; кез келген санаттағы жүргізуші куәлігі болуы; қорғаныс шлемін киюі тиіс. Не нәрсеге тыйым салынған?

Электрсамокат иелері мен пайдаланушыларына жолаушыларды, соның ішінде балаларды тасымалдауға тыйым салынады.

Сондай-ақ көлік құралын екі қолмен басқаруға кедергі келтіретіндей телефон пайдалануға тыйым салынған.

Құлаққапқа келетін болсақ, заңнамада бұған тікелей тыйым жоқ, алайда олар қауіпсіз басқаруға және жолдағы жағдайды қабылдауға кедергі келтірмеуі тиіс.

Жеке самокат иелеріне қандай жауапкершілік қарастырылған?

ІІМ деректері бойынша, электрсамокат иелері мен пайдаланушыларына жол жүрісі қағидалары қолданылады. Олар ЖЖҚ талаптарын сақтауға міндетті және заңбұзушылықтар үшін жауапты болады.

Жаза келесі жағдайларда қолданылуы мүмкін:

жолдың жүру бөлігінде жүргізуші куәлігінсіз жүру; қозғалыс ережелерін бұзу; жаяу жүргіншілерге кедергі келтіру; қиылыстардан өту ережелерін бұзу; жолаушылар тасымалы; масаң күйде басқару; ЖКО болған жерден кетіп қалу; денсаулыққа немесе мүлікке зиян келтіру.

Фото © Tengrinews.kz

ЖКО кезіндегі жауапкершілік

ЖКО кезінде жеке және кикшерингтік электрсамокаттарға ортақ ережелер қолданылады:

оқиғаның мән-жайы тіркеледі; кінәлі адам анықталады; залал мөлшері белгіленеді; өтемақы мәселесі шешіледі.

"Жағдайға байланысты әкімшілік, азаматтық-құқықтық немесе қылмыстық жауапкершілік туындауы мүмкін", - деді ІІМ өкілдері.

Апат кезінде шығынды кім өтейді?

Автомобильдерден айырмашылығы, жеке электрсамокат иелеріне міндетті сақтандыруды ресімдеудің қажеті жоқ.

Егер электрсамокатын жүргізуші басқа адамға немесе оның мүлкіне зиян келтірсе, ол шығынды азаматтық заңнамаға сәйкес өз бетінше өтеуі тиіс болады.

Еске салайық, 25 тамыздан бастап Алматыда электрсамокат пайдаланушылары үшін жаңа ережелер күшіне енеді.

Google News арқылы жаңалықтарымызды қадағалаңыз

Жазылу