Сарбазға қысым көрсеткен : Өскеменде көз жұмған сарбазға қатысты іс сотқа жолданды

АЛМАТЫ, 23 сәуір – Sputnik. Өскеменде қаза болған сарбазға қатысты қылмыстық іс сотқа жолданды, деп хабарлайды Бас прокуратура.

Өскемен гарнизонындағы әскери бөлімдердің бірінің батальон және взвод командирлеріне қатысты қылмыстық істі тергеу аяқталды.

"Лауазымды тұлғалар бірнеше рет жарғыдан тыс қарым-қатынасқа жол берген. Қаза болған әскери қызметшіге және оның алты қызметтесіне психологиялық қысым көрсеткен. Сонымен қатар взвод командирі қару-жарақты сақтау тәртібіне тиісті бақылау жүргізбей, қызметтік міндеттерін орындаудан шет қалған", - дейді прокуратура.

Тергеу барысында қылмыстарға қатысы бар барлық қызметкер анықталды. Қылмыстық іс билікті асыра пайдалану және қызметке салғырт қарау фактілері бойынша қозғалып, сотқа жолданды.

"Әскери бөлім командирі және оның екі орынбасары лауазымынан босатылып, 9 лауазымды тұлға тәртіптік жауапкершілікке тартылды", - деп жазылған хабарламада.

Еске сала кетейік, биыл 23 қаңтарда Өскемен әскери гарнизонында сарбаз Қ. Оспанов қаза болды. Ол қарауыл қызметін атқару кезінде өзіне оқ атып, алған жарақатынан көз жұмды.