Сәтбаевта ойын алаңдары жаңарды

Сәтбаевта алғаш рет қала шетіндегі аудандардың ауласы абаттандырылып жатыр. Бірнеше шағын ауданға асфальт төселіп, балалар ойын алаңдары орнатылды. Сонымен қатар жарық жүйесі қалпына келтіріліп, демалыс орындары жаңартылды.

Қала шетіндегі аулалар бұрыннан абаттандыруды қажет ететін. Жолдары ескі болғандықтан жаяу жүріп, көлікпен қатынау қиынға соғатын. Балалар алаңы да тозған. Биыл жергілікті билік төрт шағын ауданның ауласын абаттандыруға 450 млн-нан астам теңге бөлді.

Қанат Исаев, Сәтбаев қаласының тұрғыны:

- Ең бастысы, балаларға жақсы. Осы жерде, тура көз алдыңда жүреді. Есік алдына шығасың. Бұл жерде отыратын орындық бар. Сол жерде отырып, ойнап жатқан балаларға қарап отырасың. 

Қазір жұмыстың ауқымды бөлігі аяқталған. Аулалардағы жарық бағандары қалпына келтіріліп, қоқыс контейнерлері қойылды. Асфальт төсеу, ойын алаңдарын орнату мен қоқыс жәшіктерін қою жұмыстары аяқталуға жақын. Сонымен қатар биыл тұрғындар демалатын орындарды абаттандыруға қатысты бірнеше жоба қолға алынды. Бұған жергілікті бюджеттен шамамен үш млрд теңге бөлінді. Шағын аудандардың бірінде ойын алаңы мен серуендейтін аумағы бар гүлзар салынып жатыр.

Ахмет Сыздыманов, Сәтбаев қаласы әкімінің орынбасары:

- Абаттандыру жұмыстарының аясында 25 мың шаршы метр асфальт салынды. 5-6 балалар алаңы жаңартылды. Заманауи стильдегі жаңа балалар алаңдары орнатылды. Жарық шамдары орнатылды. Талдар кесіліп, орындықтар орнатып, қаланың төменгі бөлігін абаттандырдық және Ертең көшесінің басында 4 мың шаршы метрдей үлкен саябақ салынды.

Биыл облыс бойынша 50-ге жуық балалар ойын алаңы салынды. Күнделікті спортпен шұғылданатындар үшін заманауи жаттығу кешендері тұрғызылды.

Авторлары: Нұрлан Жақыпбеков, Елизавета Шалина, Нұрлан Исмаилов, Гүлшахира Серекбаева.