Сауда министрлігі Республика күніне орай тауарларға ауқымды жеңілдік жариялады

АСТАНА, 23 қазан — Sputnik. Сауда және интеграция министрлігі бүкіл ел бойынша "Republic Day" акциясын өткізетінін мәлімдеді.

24-27 қазан аралығында қазақстандықтар тауарларды жеңілдікпен сатып ала алады. Республика күніне орайластырылған акция ішкі нарықты қолдауға және халық үшін тауарлардың қолжетімділігін арттыруға бағытталған, деп атап өтті Сауда министрлігі.

"Қазақстандықтар азық-түлік емес тауарлардың кең ассортиментін 10-нан 70% - ке дейін жеңілдікпен сатып ала алады. Акцияға бүкіл ел бойынша 220–дан астам сауда нысандары, сауда - ойын-сауық орталықтары, сауда үйлері, супермаркеттер, желілік дүкендер мен маркетплейстер тартылды", - деп қуантты сауда министрлігі.

Мысалы, Астанада акцияға MEGA Silk Way және "Хан Шатыр" сияқты сауда орталықтары, сондай-ақ Magnum, Small және АНВАР супермаркеттері қатысады. Алматыда акцияға "Forum", "Mega Alma-Ata", Aport Mall East және басқа да сауда желілері қосылған.

"Жеңілдіктер негізінен азық-түлікке жатпайтын тауарларға: киім, аяқ киім, электроника, тұрмыстық техника, үй тауарлары және басқа да күнделікті санаттарға беріледі. Акция офлайн-алаңдарды да, онлайн-сауданы да қамтиды", - деп атап өтті ведомствода.

Жеңілдік жасалатын дүкендер мен базарлардың толық тізімін сілтеме арқылы көре аласыз.