Сәуірде теңге бағамы 3,1% ға нығайды

АСТАНА, 4 мамыр – Sputnik. Сәуір айының қорытындысы бойынша теңге бағамы 1 АҚШ доллары үшін 463,09 теңгеге дейін, яғни 3,1%-ға нығайды, деп хабарлады Ұлттық банк.

Қазақстан қор биржасындағы сауда-саттықтың орташа күндік көлемі бір айда 372 млн АҚШ долларынан 394 млн АҚШ долларына дейін артты. Сауда-саттықтың жалпы көлемі 8,7 млрд АҚШ долларын құрады.

"Сәуірде республикалық бюджетке трансферт бөлуді қамтамасыз ету мақсатында Ұлттық қордан 300 млн АҚШ долларына валюта сатылды. Ұлттық қордан сату үлесі жалпы сауда-саттық көлемінің 3,5%-ын немесе күніне орта есеппен 13,6 млн АҚШ долларын құрады", - деп жазылған хабарламада.

Ұлттық банк мамыр айында республикалық бюджетке трансферт бөлу үшін Ұлттық қордан 400 млн доллардан 500 млн АҚШ долларына дейінгі мөлшерде валюта сатылады деп болжап отыр.

Сәуірде "айналау" операциялары аясында шамамен 354 млрд теңге алынды. Мамыр айы бойы осы мақсатта 354 млрд теңге баламасында валюта сатылады деп жоспарланған.

Сәуір айында Ұлттық банк валюталық интервенция жүргізген жоқ.

Зейнетақы жарналарының түсімі мен теңге бағамының нығаюына байланысты БЖЗҚ зейнетақы активтерінің валюталық үлесі 40%-дан төмен болды. Осыған орай Ұлттық банк сәуірде биржадағы сауда-саттық арқылы 502 млн АҚШ долларына шетел валютасын сатып алды.