Сегіз айлық сәбидің ішінен ине табылды

Топтаманың басын әуелі елді елең еткізген мына ақпараттан бастайын. Түркістанда сегіз айлық сәбидің ішінен ине табылды. 

О баста баланың мазасы кетіп, дене қызуы көтерілген соң анасы ауруханаға әкелсе керек. Бастапқыда қызылша жұқтырды деген болжамды диагноз қойылған. Абырой болғанда дәрігерлер кешенді тексеру жүргізіп, сәбидің іш қуысында бөгде заттың бары анықталыпты. Ине сәбидің бауыр тұсынан енген екен. Сол мезетте дәрігерлер шұғыл операция жасап, балақайды аман алып қалды. Бұл жағдай барлық ата-аналар қауымына сақтық үндеуі болғандай. 

Ойыннан опық жеді 

Әлеуметтік желіде қауіпті тренд тарады. Қаңтардың қытымыр аязында, көбі ыстық суды аспанға шашып, ерекше көрініс түсіруге тырысып жатыр. Алайда бұл әрекет бәрінде бірдей сәтті шықты деуге келмес. Тренд қуамын деп қайнаған суға күйіп қалғандар аз емес. Тіпті сол сәтті таспалап желіге жүктеп, жарысып жатқандар көп. Оқырмандар біріне ақыл айтса, тағы бірінің әрекетін баланың ойынына теңеп пікір білдірген. 

Мейірімділік әлемді құтқарады 

Үскірік аязда біреу ойын іздеп секірсе, бірі тоңып секірді. Тас жол бойында дірдек қаққан иттің жағдайы жүргізушіні бей-жәй қалдырмады. Талғат Қаймусин есімді азамат жол жиегінде тоңып тұрған итті байқап қалады. Салпанқұлаққа жаны ашып, көлігіне салып алып кетеді. Артынша, әлеуметтік желіге жолдағы видеоларын жариялап, иттің иесін іздей бастайды, көп ұзамай іздегені табылды. Азаматтың бұл әрекеті оқырман қауымның жүрегін елжіретті. Нағыз жанашыр осындай болуы керек деген пікір көптеп жазылды.