Селден қалай қорғануға болады? ТЖМ кеңес берді

Құтқарушылар дауылды ескерту жарияланған кезеңде өзен арналары, шатқалдар және сел жүруі ықтимал өзге де қауіпті аумақтарда болмауға шақырды. Эвакуация туралы хабарлама түскен жағдайда қауіпті аймақтан дереу шығу қажет.

ТЖМ мәліметінше, селдің жақындағаны туралы ескерту берілсе немесе оның алғашқы белгілері байқалса, адамдар ғимараттан тез арада шығып, айналасындағыларды қауіп туралы хабардар етіп, қауіпсіз жерге бет алуы тиіс.

Үйден шығар алдында пештің отын өшіріп, газды жауып, электр құрылғыларын тоқтан ажыратып, жалпы электр қуатын өшіру ұсынылады. Бұл өрттің алдын алуға мүмкіндік береді.

Суға түсу мен демалыста абай болыңыз: ТЖМ маңызды ескерту жариялады

Сел қаупі жоғары аймақтарда тұратын тұрғындарға құжаттарын, дәрі-дәрмектерін, жылы киімдерін, ауыз су мен азық-түлік қорын алдын ала әзірлеп, ең қажетті заттар салынған «дабыл сөмкесін» дайындап қоюға кеңес берілді.

Сондай-ақ сел жүрген кезде опырылу қаупі бар жерлерден, тас құлауы мүмкін аумақтардан, зақымданған электр желілері мен газ құбырларынан алыс болған жөн.

ТЖМ сел қаупі бар өзендердің маңындағы елді мекен тұрғындарын ресми хабарламаларды мұқият бақылауға және қажет болған жағдайда алдын ала белгіленген бағыттар бойынша эвакуациялануға шақырды. Эвакуация бағыттары мен жиналу орындары туралы ақпаратты аудандық төтенше жағдайлар бөлімдерінен алуға болады.

Жабық көліктің іші 60 градусқа дейін қызып кетеді: ТЖМ ата-аналарға шұғыл ескерту жасады

Құтқарушылар негізгі қауіпсіздік ережелерін де еске салды:

өзеннің жоғарғы ағысында қатты жаңбыр жауып жатса, өзен арнасынан дереу алыстау; сел қаупі бар өзен арналары мен табиғи көл бөгеттерінің маңында демалмау; қозғалып келе жатқан сел ағынына 50–70 метрден жақындамау; тас құлау және опырылу қаупіне байланысты тік жартастар мен құлама беткейлердің жанында аялдамау; селдің алғашқы белгілері байқалғанда тау беткейімен жоғары көтеріліп, өзен арнасынан мүмкіндігінше алыстау; сел ағыны өткеннен кейін бірден өзен арнасына түспеу.