Семей қаласы әкімінің сайлауына дауыс беру басталды

Семей қаласы әкімінің сайлауына дауыс беру басталды.

Қазірде шаһарда 128 сайлау учаскесі өз жұмысын бастады, оның ішінде 110 — ашық, 18 — азаматтардың уақытша болатын жеріндегі учаске (жабық).

Комиссиялардың жалпы құрамы — 929 азаматты құрайды. Ал сайлаушылар саны — 220 761 адам. 

Барлық сайлау учаскелері кеңсе тауарларымен, ақпараттық стендтермен, дауыс беру жәшіктерімен және жасырын дауыс беру кабиналарынмен қамтылған.

— Барлық учаске уақытында ашылып, қалыпты режимде жұмыс істеп жатыр. Бұл — Семей қаласы және тұтас ел үшін маңызды оқиға. Сол себепті тұрғындардың белсенді қатысатынына үміттенеміз, — деді қалалық аумақтық сайлау комиссиясының төрайымы Гүлжан Қуанышева.

Дауыс беру сағат 20:00-ге дейін жалғасады, одан кейін дауыс санау басталады.

Қазір алғашқы болып дауыс беруге келген тұрғындарға сыйлықтар табысталып жатыр.

Еске сала кетейік, Семейдің бұрынғы әкімі Талғат Мұратовтың өкілеттігі мерзімінен бұрын тоқтатылған еді.

Бастапқыда сайлау додасына төрт үміткер тіркелді. Алайда олардың бірі — Балалар мен жасөспірімдер шығармашылығы сарайының директоры, қалалық мәслихат депутаты Қанат Шапатов 7 қазанда жеке себептеріне байланысты кандидатурасын алып тастайтынын мәлімдеді. Осылайша, сайлау бюллетенінде үш үміткер ғана қалды.