Семей тұрғыны Паркинсон дертімен күресудің әдісін тапты

Қолөнермен айналыса бастады.

 Ағашты өңдеп, түрлі бұйым жасайды. Айтуынша, бұл кәсіп біріншіден, ойын бөледі, екіншіден, қолының дірілін азайтып, сырқаты туралы ұмытады.

Анатолий Савенконың үйі шағын шеберханаға айналған. Қолы қалт еткенде ағашты ойып, ойыншық жасайды. Сүйікті кәсібіне кіріскен сәттен қолының дірілі басылып, қимылы ширай түседі.

Анатолий Савенко, зейнеткер:

- Ағашпен жұмыс істегенде жаным тыныштық табады. Ойым бөлініп, сырқатымды ұмытып кетемін. Бір ойыншықты жасап шыққанда көңілім көтеріліп, өмірге деген құлшынысым артады. Оларды көрмелерге апарып балаларға естелік ретінде беремін.

Анатолий Савенко Семейдің байырғы тұрғыны. Әскерден келген соң фельдьегерь болып жұмысқа тұрады. Мемлекеттік, әскери және коммерциялық құпия хаттарды қолдан қолға жеткізіп 40 жылдан астам еңбек еткен. 2019 жылы денсаулығы сыр беріп, Паркинсон диагнозы қойылған. Зейнеткердің талпынысын жұбайы да қолдайды.

Елена Савенко, А. Савенконың жұбайы:

- Кейде түнде ұйқысы бұзылып, қолының дірілі күшейеді. Ондай сәтте шеберханаға барып, жұмысқа кіріседі. Ойыншық жасағанда тынышталып, сабырға келеді. Сөйтіп, ұйқысы келгенше жұмыс істеп, содан кейін ғана демалады.

Абай облысында Паркинсон дертіне шалдыққан 700-ден астам адам есепте тұр. Дәрігерлердің айтуынша, науқастарға қажетті дәрі-дәрмек пен жаттығуға арналған құралдар беріледі. Мамандар маңыздысы науқастың еңсесі түспеуі керек дейді. Сол себепті өзіне ұнаған іспен айналысуы маңызды.  

Ғалия Әлібекова, невролог: 

- Науқас ұсақ моторикамен айналысқанда дофаминнің бөлінуін арттыратын гормондар түзіледі. Бұл Паркинсон ауруына жауапты жүйелердің жұмысын қолдайды. Науқастың өзіне ұнайтын іспен шұғылдануы маңызды. Тактильдік және эмоциялық сезімдер арқылы моториканың әсері байқалады. Себебі кез келген дерт науқастың көңіл күйіне байланысты.  

Рүстем Қайратұлы, тілші:

- Анатолий Савенконың жасаған ойыншықтарын жастар тіпті үйінен келіп алып кетеді екен. Бізге де біреуін сыйға тартты. Бұл тек ағаштан жасалған бұйым емес еңбек пен өмірге деген құштарлықтың белгісі.

Рүстем Қайратұлы, Медет Өмірханов