Ғалымдар тісжегіден қорғанудың қарапайым әдісін тапты

АСТАНА, 30 қазан — Sputnik. Калифорния университетінің ғалымдары тісті тісжегіден қорғауды күшейтудің қарапайым әдістерінің бірін анықтады, деп хабарлайды Sputnik Қазақстан Газета.Ru-ға сілтеме жасап.

Бір стақан қарапайым су ауыз қуысының табиғи қорғаныс механизмін бір сағатта жандандыратыны белгілі болды.

Экспериментке профилактикалық стоматологиялық тексеруден өтіп жатқан 5 пен 10 жас аралығындағы 105 бала қатысты. Алғашқы сілекей талдауынан кейін балалар үш топқа бөлінді: біріншісі 500 миллилитр су, екіншісі 200 миллилитр алма шырынын алды, үшіншісі бақылау тобы ретінде қатысты. 45-60 минуттан кейін зерттеушілер қайта сілекей үлгілерін жинап, оларды жеті негізгі параметр бойынша талдады.

Су ішкен балалардың сілекей қышқылдығы мен эмальды бұзатын ферменттердің деңгейі төмендеген. Сонымен бірге олардың ауыз қуысындағы жергілікті иммунитетке қатысатын қорғаныш ақуыздары мен иммуноглобулиндер деңгейі жоғарылады. Алма шырынын тұтынған және ешқандай сұйықтық ішпеген балаларда мұндай әсер байқалмады.

Авторлар су сілекейдің рН деңгейін қалыпқа келтіруге көмектесетінін, ауыз қуысының жергілікті қорғанысын қалпына келтіретінін және осмолярлықты (сілекейдегі тұз, қант, ақуыз және басқа еріген заттар концентрациясының өлшемі) төмендететінін атап өтті.

Бала тәтті сусын ішкен кезде сілекейдің осмолярлығы артып, ондағы белсенді заттардың мөлшерін көбейтеді. Бұл оның қалыпты құрамы мен қызметін бұзуы мүмкін.

Ғалымдардың пікірінше, қантты сусындарды ауыз сумен алмастыру, әсіресе балалар үшін тіс жегі мен қызыл иектің қабыну ауруларының алдын алудың тиімді және қолжетімді әдісі болмақ.