Сенат Спикері төрағалығымен палата бюросының отырысы өтті

Соған сәйкес, алдағы бейсенбіде «Қазақстан Республикасының Үкіметі мен Француз Респуб­ликасының Үкіметі арасындағы адамдарды реад­миссиялау туралы келісімді ратификациялау ту­ралы» заң қаралады. Бұл заңның нормалары көші-қон процестерін басқаруды және заңсыз көші-қонға қарсы іс-қимыл саласындағы екі­жақ­ты ынтымақтастық үшін құқықтық негіз қалып­тастыруды көздейді.

Заңның негізгі міндеттерінің қатарына Тараптар мемлекеттерінің аумағына заңсыз кірген, жүрген не тұратын адамдарды қайтарудың тиімді, реттелген және өзара пайдалы тетігін қамтамасыз ету, сондай-ақ көші-қон режимдерін теріс пайдаланудың алдын алу жатады.

Сондай-ақ «Қазақстан Республикасының Үкіметі мен Моңғолия Үкіметі арасындағы зей­нетақы саласындағы ынтымақтастық туралы ке­лі­сімді ратификациялау туралы» заң Сенат отырысының күн тәртібіне шығарылды. Келісімді ратификациялау Қазақстан Республикасының Үкіметі мен Моңғолия Үкіметінің арасындағы зейнетақы саласындағы ынтымақтастықты дамытуға мүмкіндік береді және екі ел азаматтарының зейнетақымен қамсыздандыру саласындағы құқықтарын қамтамасыз етеді. Нақты айтқанда, осы келісім арқылы азаматтарға ынтымақты зейнетақы тағайындау бөлігіндегі қатынастар реттеледі және әскери қызмет, жоғары және орта арнаулы білім беру ұйымдарында оқу кезеңдеріндегі еңбек өтілін өзара есепке алу көзделеді.

Сонымен қатар сенаторлар бұған дейін Мәжіліс қабылдаған заңдарды жұмыс үшін палатаның тұрақты комитеттеріне бөліп берді және Мемлекет басшысының тапсырмаларын іске асыру аясында жоспарланған алдағы іс-шараларды пысықтады.