Президент төрағалығымен Үкіметтің кеңейтілген отырысы өтеді

Жиында еліміздің 2025 жылғы әлеуметтік-экономикалық дамуы қорытындыланып, Үкіметтің алдағы кезеңге арналған негізгі міндеттері айқындалады. Премьер-министр Олжас Бектеновтің, Ұлттық банк төрағасы Тимур Сүлейменовтің, Премьер-министрдің орынбасары – Жасанды интеллект және цифрлық даму министрі Жаслан Мәдиевтің, бірқатар өңір әкімдерінің баяндамалары тыңдалады.

Естеріңізге сала кетсек, бұған дейінгі Үкімет отырысында туризмді дамыту мәселелері талқыланып, 2026-2030 жылдарға арналған «Қазақстан балалары» тұжырымдамасы бекітілген еді.

Бірінші мәселе бойынша негізгі баяндаманы Спорт және туризм министрі Ербол Мырзабосынов жасады. Оның мәліметінше, 2025 жылы туризм саласына салынған инвестиция көлемі 32 пайызға өсті. Бұл – 1 триллион 254 млрд теңге.

Коллаж: Kazinform / Freepik

Министрліктің тізімінде жүзеге асырылу жоспарланған 328 инвестициялық жоба қамтылған. Негізгі жобалардың қатарында «Ой-Қарағай» тау-шаңғы курорты, Hilton және Mandarin Oriental қонақ үй кешендері, «Жібек жолы» ойын-сауық кешені, Keruen Inn жол бойындағы сервистік объектілер желісі бар. Аталған жобаларды іске асыру туризм саласында шамамен 10 мың тұрақты жұмыс орнын құруға мүмкіндік береді.

Дегенмен, министр негізгі көрсеткіштердің өсу үрдісіне қарамастан, бұл салада әлі де бірқатар шешілмеген жүйелі мәселе бар екенін жасырған жоқ.

- Ақмола, Қарағанды, Павлодар, Абай және Жетісу облыстарындағы курорттық аймақтарда сумен қамтамасыз ету және орталықтандырылған кәріз жүйесі мәселелері әлі де шешілмеген. Суды, соның ішінде ұңғымаларды пайдалану мәселесіне арнайы назар аудару қажет. Бұл мәселе, әсіресе, Алакөл жағалауында аса өзекті болып тұр. Алакөл көлінің екі беттегі жағалауында да жағаны бекіту жұмыстарын жүргізу қажет. Мысалы, Абай облысындағы бірқатар демалыс базалары қауіпті жерде, оларға су тым жақындап қалған. Осыған байланысты бұл мәселені шешуді кейінге қалдыруға болмайды. Сонымен бірге Каспийдің және Жетісу облысындағы Алакөл жағажай аймақтарында судың түбін тереңдету жұмыстарын жүргізу керек, - деді ол.

Ербол Мырзабосыновтың айтуынша, кейбір курорттар туристер ағынының көбеюіне дайын болмай жатыр. Бурабай курорттық аймағында маусымның қызған шағында кептеліс болады.

Фото: Сув ресурслари ва ирригация вазирлиги

Ал Балқаш көлі бағытында жол бойындағы қызмет көрсету объектілерінің жетіспейтіні, жанармайдың тапшылығы, яғни жанармай құю станцияларында сағаттап тұратын кезектер байқалады. Барлық дерлік курорттық аймақта қатты тұрмыстық қалдықтар полигоны жоқ деуге болады.

- Кей жерлерде абаттандыруға қатысты ұйымдастырушылық сипаттағы мәселелер де бар, дәретханалар мен қоқыс контейнерлерінің болмауы да осыған жатады. Жағажай аймақтары көбінесе жабдықталмаған және аймақтарға бөлінбеген, мұндай жағдай барлық өңірге қатысты болып тұр. Өңірлер бұл мәселенің шешілгені және жалпы саны 60 санитарлық-гигиеналық тораптың орнатылғаны туралы есеп берді. Алайда қайта тексерген кезде олардың көбі жабық болды және желілерге қосылмаған, - деді министр. 

Ал "Kazakh Tourism" АҚ Басқарма төрағасы Талғат Ғазизов елімізді халықаралық деңгейде ілгерілету жұмыстарына тоқталды. Оның дерегінше, өткен жылы Қазақстан 14 халықаралық туристік көрмеде таныстырылды. Барлық өңір Kazakh Tourism-мен тығыз әріптестікте жұмыс істеді. Осы жылы 12 халықаралық туристік көрмеге қатысу жоспарланып отыр.

Фото: Үкімет

Бұдан бөлек, Алматы қаласы Азия мен Таяу Шығыстағы мақсатты қалаларда, соның ішінде Мумбай, Дубай, Шанхай, Сеул, Токио және Сингапурда 10 роуд-шоу өткізуді жоспарлап отыр.

- Биыл әлемдік жұлдыздардың қатысуымен бірқатар ірі концерттік іс-шара өткізу жоспарланып отыр. Алғашқы концертке Тимбалэнд, Николь Шерзингер, Баста Раймс және басқа да әртістер қатысады, ол мамыр айына белгіленген. Жалпы жыл соңына дейін кемінде 5 ірі концерттік шара өтеді деп күтілуде, - деді Талғат Ғазизов. 

Талқыланған мәселені түйіндеген Премьер-министр Олжас Бектенов Үкімет Аппараты туристік нысандарды жүйелі түрде тексеріп, жағдайды үнемі қадағалап отыратынын ескертті. Сонымен қатар жазғы туристік маусым басталғанға дейін министрлік пен әкімдіктер демалушыларға қолайлы жағдайды қамтамасыз ету үшін барлық қажетті шараларды қабылдау тиістігін айтты.

Фото: Kazinform

Осы орайда Үкімет басшысы Туризм министрлігі, Мәдениет министрлігі, «Kazakh Tourism» компаниясы және әкімдіктерге бірге бір ай мерзімде Қазақстандағы барлық мәдени, спорттық және басқа да бұқаралық іс-шараларды ескере отырып, 2026 жылға арналған егжей-тегжейлі жұмыс жоспарын әзірлеуді, Экология министрлігіне кәсіпкерлер палатасымен бірлесіп, тиісті заңнамалық түзетулер әзірлеуді тапсырды.

- Бизнес өкілдері инвестициялық жобаларды іске асыру кезінде су айдындарының жағалауындағы қорғау аймақтарына қойылған шектеулерге немесе кіруге тыйым салынуына байланысты қиындықтарға тап болады. Мысалы, аквапарк құрылысына қажетті инфрақұрылым жүргізу мүмкін емес. Бұл мәселеде барлық тарапқа қолайлы болатын шешім іздеген жөн. Су ресурстары министрлігі озық халықаралық тәжірибені зерттеп, тиісті заңнамалық түзетулерді әзірлеуі қажет, - деді Олжас Бектенов.

Отырыстың күн тәртібіне шығарылған екінші мәселе бойынша Оқу-ағрату министрі Жұлдыз Сүлейменова негізгі баяндама жасады. 

- Мемлекетіміз қабылдаған жүйелі шаралар және қол жеткізілген нәтижелер «Қазақстан балалары» бірыңғай тұжырымдамасына негіз болды. Тұжырымдама балалардың құқығын қорғаудың бірізділігін және шаралардың тиімділігін арттырады. Балалардың негізгі құқықтарын қамтитын төрт бағыттан тұрады. Олар: балалардың қауіпсіздігі, білім, денсаулық, отбасыға және әлеуметтік қорғаудағы құқықтары, - деді ол.

Фото: Оқу-ағарту министрлігі

Министрдің айтуынша, тиімділікті бағалау үшін 10 индикатор қарастырылған, нақты іске асыру үшін 158 іс-шара жоспарланған. Мектептерде педагог-психолог сағатын енгізу, зорлық-зомбылыққа ұшыраған балаларға 40 көмек кабинетін ашу көзделіп отыр. Қаржыландырудың жалпы көлемі 1,3 трлн теңге.

Денсаулық сақтау министрі Ақмарал Әлназарованың айтуынша, бұрын тек ересектерге жасалып келген «гамма-пышақ» аппаратындағы радиохирургиялық операциялар енді балаларға да жүргізіле бастады. 

Жыл сайын орта есеппен 700 шала туған нәрестеге ретинопатияны түзету жүргізіледі. 2 мыңнан астам балаға кардиохирургиялық операциялар жасалып, жүрек ақаулары дер кезінде түзетіліп отырады. Соңғы үш жылда шетелге туыс емес донордан бағаналы жасушаларды трансплантациялауға балаларды жіберу 3 есе, ал кардиохирургиялық емге жолдау 5,2 есе қысқарды және де бұл қадамдар балалар арасындағы мүгедектік деңгейін 11 пайызға төмендетуге мүмкіндік берді. Биыл елімізде протондық, йодтерапия және тамырлы ақауларды емдеу толық қолжетімді болады.

Фото: Еңбек және халықты әлеуметтік қорғау министрлігі

Отырысты қорытындылаған Үкімет басшысы 1 ақпаннан бастап барлық білім беру ұйымына «тосыннан тексеру» қағидаты бойынша ерекше бақылау мен қадағалау жүйесі енгізілетінін айтты. Бұл балаларды сауықтыру, олардың қауіпсіздігі мен тамақтану мәселелеріне қатысты.

- Денсаулық сақтау, Оқу-ағарту, Мәдениет, Еңбек және әлеуметтік қорғау, Туризм және Ішкі істер министрліктеріне әкімдіктермен бірлесіп, осы жылдың 30 қаңтарына дейін ерекше бақылау мен қадағалауға жататын нысандар тізілімін дайындауды тапсырамын,- деді ол.

Сонымен қатар Олжас Бектенов Оқу-ағарту министрлігіне Мәдениет және ақпарат министрлігімен бірлесіп, «Қазақстан балалары» тұжырымдамасын іске асыру бойынша ақпараттық науқанды ұйымдастырып, жоспарланған іс-шаралар мен олардың орындалуы туралы халықты ашық әрі түсінікті жолмен хабардар етіп отыруды тапсырды.