Шекараға дейінгі жол жөнделді

Өскеменнен Ресей шекарасына дейін апаратын жол толық жөнделді.

Жаңа халықаралық трассаның бойы абаттандырылып, демалыс алаңдары, аялдамалар мен санитарлық тораптар орнатылды. Жолаушыларға жайлы жағдай жасалып, барыс-келіс те жеңілдеді. «Елдің солтүстік-шығыстағы қақпасына апаратын жол ел экономикасы мен халықаралық қатынастарда маңызды рөл атқарады», - дейді мамандар.

Шемонаиха ауданынан шекараға дейінгі бұл жолдың тозғаны сонша, ары-бері өткен көліктің сынбай өтуі екіталай еді. Күніне жүздеген жолаушы өтетін тасжолдың асфальт төсенішінен түк қалмай, ой-шұңқырға толып кетті. 

Әйтуір биыл талайды мезі қылған бұл автокөлік жолын жөндеу аяқталды. Енді мұндағы өткізу бекетінің жұмысы да жанданды.

Александр Игнатов, мердігер компания өкілі:

- Бейтарап учаскеден бастап өткізу пуктіне дейінгі жол тақтайдай болды. 3 жолақты тасжолмен көп көлік өтеді. Бұрынғыдай күтіп тұрмайды.

Ал Өскемен мен Шемонаиха қаласына дейінгі аралықты жөндеу былтыр басталған болатын. Қазір 93 шақырым жолдағы жұмыстар аяқталды. 

Алмас Қасенов, «ҚазАвтожол» ҰК ШҚО филиалы директорының орынбасары:

- Орташа жөндеу ресайклеу әдісі арқылы екі қабатты асфальт төселді және абаттандыру жұмыстары, жол белгілерін жаңарту жолды таңбалау жұмыстары да қарастырылған.

Суық ресайклеу әдісі соңғы жылдары өңірдегі жол-құрылыс жобаларында жиі қолданылады. Яғни ескі асфальт қайта өңделіп, жаңадан салынатын қабат астына төселеді. Бұл қаржыны үнемдеп қана қоймай, жол төзімділігін де арттырады. Өңір тұрғындарының күткені де осы.

«Ел шекарасындағы жол сапасы туристер үшін өлкедегі инфрақұрылымның деңгейінен хабар береді»,- дейді мамандар. Сондықтан бұл трасса тек логистикалық мүмкіндікті жетілдіріп қоймай, туризмді дамытуға да серпін бермек.

Эльмира Ахметова, Дмитрий Пыхтин