СҚО да 1100 шақырым жол жөнделді

24.KZ дереккөзінен алынған мәліметтерге сүйене отырып, Qazaq24.com түсініктеме жасады..

Биыл «Жезқазған – Петропавл» халықаралық дәлізінің Солтүстік Қазақстан облысындағы аумағы толық жөнделді, деп хабарлайды 24KZ. Оған ел қазынасынан 30 млрд теңге бөлініп, республикалық тасжолға асфальт төселді. Сонымен қатар жол бойына электронды таразы мен бейнебақылау камералары орнатылып, аялдамалар қалпына келтірілді.

Республикалық маңыздағы «Жезқазған – Петропавл» күрежолы Солтүстік Қазақстан, Қостанай, Ақмола және Ұлытау облыстарын байланыстырады. Жалпы ұзындығы 954 шақырым. Биыл халықаралық дәліздің теріскейдегі аумағы толық жөнделіп, жаңадан асфальт төселді. Енді жүргізушілер діттеген жеріне қиналмай жетеді. Өйткені бұған дейін жолдың жағдайы сын көтермейтін.

Алмас Еменалин, көлік жүргізушісі:

- Мына жол жөнінде айтатын болсақ, қазір «Петропавл – Жезқазған» жолы жақсы. Жиі жүріп тұрамыз. Бұрын шұңқырлар көп болатын. Қазір жол жақсарды. Сонымен оңды болды.

Жоба аясында тас жолдың бойындағы 42 аялдама қалпына келтіріп, 67 су өткізу құбыры жаңартылды. Жол белгілері ауыстырылып, жолаушылар тоқтап демалатын орындар реттелді. Сонымен қатар бақылау жүйесі орнатылды.

«Жезқазған – Петропавл» республикалық тасжолының бойына осындай электронды таразы орнатылды. Ол осы жерден өткен жүк көлігінің салмағын бірден анықтап, шамадан асқан жағдайда жүргізушіге ірі көлемдегі айыппұл салынады.

Биыл тасжолдың Солтүстік Қазақстан облысындағы қалған 215 шақырымы орташа жөндеуден өтті. Оған ел қазынасынан 30 млрд теңге бөлінген. «Енді басқа да республикалық бағыттарды қалпына келтіру керек», – дейді мамандар.

Талғат Смағұлов, «ҚазАвтоЖол» ҰК» СҚОФ директоры:

- Келесі жылы Көкшетау бағытының аумағын орташа жөндеу жоспарланып отыр. Сонымен қатар Петропавлдың айналма және Булаев қаласына шығатын жолдар қалпына келтіріледі. Одан бөлек Ақмола облысынан Ресей Федерация шекарасына дейінгі учаскілер қарастырылған.

Бұл бағыттың әлеуметтік-экономикалық маңызы өте зор. Оның бойымен тәулігіне 3 мыңға дейін автокөлік қатынайды. Жалпы биыл облыс бойынша барлық деңгейдегі 1100 шақырым жол жөнделді.

Авторлары: Айдарбек Айтмұхамбетұлы, Қуаныш Қазбеков

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.