Shoqan брендінің иесі Борат бейнесіне қатысты сынға жауап берді

Shoqan брендінің иесі Ұлықбек Шарипов әлеуметтік желіде қызу талқыланған бейнероликке қатысты мәлімдеме жасап, қоғамнан түскен сын-пікірлерді ескеретінін айтты.
Оның айтуынша, дау бірнеше ай бұрын жарияланған ескі видеодан кейін туындаған.
«Аталған видеоны алып тастадық. Біздің мақсатымыз Бораттың бейнесін хайп үшін пайдалану немесе Қазақстанға, қазақ халқына, ұлттық мәдениетімізге не мемлекеттік тілімізге құрметсіздік көрсету болған жоқ. Бірақ егер қоғам оны дәл солай қабылдаса, демек, біз бұдан міндетті түрде сабақ алуымыз керек», – деді Ұлықбек Шарипов.
Бренд иесі барлық пікір мұқият оқылғанын және олардың алдағы жұмыста ескерілетінін атап өтті.
Сондай-ақ ол Shoqan үшін Қазақстанға, қазақ тіліне және ұлттық құндылықтарға деген құрметтің маңызды екенін айтты. Оның сөзінше, компания елімізде қазақстандық брендті дамытып, жұмыс орындарын ашып, білім беру саласына инвестиция салып келеді. Сонымен қатар қазақ және ағылшын тілдерінде білім беретін мектеп ашылған, онда аз қамтылған отбасылардан шыққан балалардың шамамен 40%-ы толық грант негізінде оқиды.
Контенттің басым бөлігінің орыс тілінде жариялануына қатысты пікірлерге де тоқталған кәсіпкер мұны аудиторияның ерекшелігімен байланыстырды.

«Аудиториямыздың едәуір бөлігі – орыс тілді оқырмандар, сондықтан контенттің бір бөлігі сол аудиторияға бейімделіп орыс тілінде жарияланады. Бірақ бұл қазақ тіліне деген құрметтің жоқтығын білдірмейді. Біз қазақ тілінде де тұрақты түрде контент жариялап келеміз және алдағы уақытта оның үлесін одан әрі арттыра береміз», – деп жазды ол. 

Мәлімдеме соңында Ұлықбек Шарипов кез келген адам мен компания қателесуі мүмкін екенін айтып, ең бастысы – қателікті мойындап, одан сабақ алу екенін жеткізді. Сонымен қатар пікір білдірген азаматтарға алғысын білдіріп, брендтің қоғам пікірін естігенін айтты.
Айта кетейік, бұған дейін әлеуметтік желі қолданушылары Shoqan брендін Борат бейнесін пайдаланған видеосы үшін сынға алған болатын. Олардың пікірінше, Борат образы Қазақстан мен қазақ халқына қатысты қорлайтын стереотиптермен байланысты.
Threads әлеуметтік желісінде қолданушылардың бірі: «Ұлттық намысты қаралым мен трендке айырбастауға болмайды. Бұл мәселеге қатысты үнсіз қалмай, ашық пікір білдіру керек», – деп жазды.
Shoqan – Қазақстанда негізі қаланған ерлер киімі бренді. Компания классикалық костюмдер мен casual бағытындағы киімдерді шығарады.
Ұлықбек Шарипов – қазақстандық кәсіпкер, Shoqan және Shoqan Casual, Ushiro брендтерінің негізін қалаушы және Forbes Kazakhstan-ның «30 жасқа дейінгі 30» тізіміне енген кәсіпкер.