ШҚО: 85 шақырым электр желісі ешбір мекеменің балансында болмай шықты

Риддерде 85 шақырым электр желісінің ешқандай мекеменің балансында жоқ екені анықталды.

Электр сымдары мен трансформаторлық қосалқы станциялардың жылдар бойы меншік иесі болмаған. Жергілікті билік желілерді жеке компанияға өткізу үшін,  құжат дайындап жатыр. Себебі сымдар тозып, бірнеше шағын ауданда жарық жиі сөнетін болған.  

Мына бағаналар қисайып, құлайын деп тұр. Электр желілерінің жүргізілгеніне жарты ғасырдан асты. Бірақ меншік иесі жоқ. Еш жерде тіркелмегендіктен жылдар бойы жөндеу көрмеген. Қазір қала бойынша 85 шақырым сым мен 26 трансформаторлық қосалқы станция қараусыз тұр.   Оның басым бөлігі апатты деп танылды. Сондықтан кейбір шағын ауданға энергия жетпей жатыр.

БЛИЦ:

- Жарық жиі сөнеді. Қуат көзі жетіспейді.

- Күн сайын жарықсыз отырамыз. Әсіресе кешке сөндіріп тастайды.

- Жел соққанда апатты жағдайлар жиі болады. Өте ыңғайсыз. 

Бұл мәселеге қатысты қалалық әкімдік қызметкерлері қараусыз қалған электр желілерін түгендеп, жеке компанияның меншігіне беріп жатыр.

Қаныбек Төлеухан, қала әкімінің орынбасары:

- Бұлардың біз 85 шақырымын біз толықтай барлық құжаттама жұмыстарын аяқтадық. Жаңағы техпаспорт дейміз, госакт дейміз, жер құжаттары, бәрі бітті. Енді оның барлығын біз бүгінгі таңда электр қамтамасыз ету мекемесіне берудеміз. 

Риддердегі электр желісінің жалпы ұсындығы 700 шақырымға жуықтайды. Қазір қуат көзімен қамту компаниясы жөндеу жұмыстарын жоспарлап жатыр. Мекеме соңғы 4 жылда 17 шақырымын ауыстырып, қауіпсіздік жүйесін іске қосты. 

Думан Қадырбаев, қалалық АЭЖ бастығы:

- Одан бөлек 5 трансформаторлық қосалқы станциясы ауыстырылды. Бұл ақаулардың алдын алуға мүмкіндік берді. Бұл шара жарық берудің сапасын арттырды.

Шығыс Қазақстан және Абай облыстарындағы электр желілері 84 пайызға тозған. Бұл орайда аталған екі өңірде де  ауқымды жөндеу жұмыстары жүргізілмек.

Айдарбек Айтмұхамбетұлы, Вячеслав Ветлугин, Дмитрий Пыхтин