БҚО да 565 шақырым электр желісі жаңарады

Энергетикалық және коммуналдық секторды жетілдірудің ұлттық жобасы аясында Батыс Қазақстан облысында 565 шақырым электр желісі жаңғыртылмақ, деп хабарлайды 24KZ. Бұл мақсатқа республикалық бюджеттен 10 миллиард теңге қарастырылған. Қаржының қазан айында бөлінгеніне қарамастан белгіленген нысандарда қызу құрылыс жүріп жатыр.

Батыс Қазақстан облысында түрлі кернеудегі 22 мың шақырымдай электр желісі мен 3 мыңнан астам трасформатор бар. Оның 78% тозығы жеткен. Осы көрсеткішті жақсартуда аймақта ауқымды істер жоспарланған. Мәселен, биыл комуналдық және энергетикалық секторды жаңғыртудың ұлттық жобасы аясында өңірге 10 млрд теңге бөлінді. Бұл қаржыға 565 шақырым электр желісі алмастырылмақ.

Подстепной ауылы облыс орталығының іргесінде орналасқан. Соған қарамастан жауын-шашында, дауылда тұрғындар жиі жарықсыз қалып жатады. Қисайған бағандар, салбыраған сымдар үп еткен желде үзіледі. Биыл осы тозығы жеткен электр желісі толық жаңармақ.

Асқар Ғатауов, Подстепной ауылының тұрғыны:

- Ескірген, қисайып тұрған сымдар үзілуі мүмкін. Қатты желдерде жарық сөнеді, үзіліп қалады дегендей. Менің мына жерде тұрып жатқаныма 40 жылдың үстіне шығып кетті. Бағандар ескірді ғой, бәлен жыл болды, соны ауыстырып жатыр. Анау жақтан бері ауыстырып келе жатыр дейді, ол енді жақсы зат қой.

Әділет Жанәділов, мердігер компания өкілі:

- Подстепноеға 27 км берілген. Қазір 18 км қойылып тұр. Сым тартатын бөлек бригада. Олар да келіп, жабдықталып шығайын деп жатыр. Сымын тартады. Осы айда бітіруіміз керек.

Коммуналдық және энергетикалық секторды жаңғыртудың ұлттық жобасы аясында қаралған 10 млрд теңгенің биыл 3 млрд-ы игерілмек. Оралдан бөлек Қаратөбе, Шыңғырлау, Бөрлі, Жәнібек, Тасқала, Жаңақала аудандарында желілер жаңартылады. Одан бөлек биыл электр желілерін таратушы компанияның жөндеу қоры мен инвестициялық бағдарламасы аясында 770 шақырым желі жөнделді. Сонда 120 мың тұтынушыға қызмет көрсету сапасы жақсарып, саланың тозығы жету көрсеткіші 3,5% төмендеген. Ал келер жылға жалпы құны 47 млрд теңгенің 14 жобасын жүзеге асырылмақ.

Асқар Ғайсин, аймақтық электр желілерін тарату компаниясының техникалық директоры:

- Энергетика және коммуналдық секторды жаңғырту бойынша Астанада «Казцентр ЖКХ» деген техникалық операторы бар. Соған өтініш беріп  қойғанбыз. Оған 14 жобамыз кіріп отыр. Келесі жылға өтінішті 47 млрд теңгеге бергенбіз. Қазір өтініш қаралу үстінде. Егер сол қаржы толықтай берілгенде 2026 жылы 47 млрд игерсек, біз 16-17% тозуын түсіреміз.

Күні бүгін өңірдегі электрмен жабдықтау саласының 78% тозығы жеткен. Көнерген желіні толық жаңартуға мамандардың есептеуінше 170 миллиард теңге керек.

Авторлары: Е. Жылқайдарұлы, Б. Жарылғасов, Э. Аюпов