ШҚО құтқарушылары биыл 400 ден астам жедел шақыруға барды

Биыл Шығыс Қазақстан облысының құтқарушылары 400-ден астам жедел шақыртуға шықты.

Су тасқыны, өрт, техногендік сипаттағы төтенше жағдайларда талай адамның өмірін арашалап қалды. Солардың бірі Болат Нұрдыбаев. Арнайы техниканың тілін меңгерген маман түрлі шақыртуларға топ командирі ретінде барып, әріптестеріне үлгі көрсетіп жүр.

Шапшаң қимыл мен жинақылық. Бұл Болат Нұрдыбаевтың өзіне қойған басты талабы. Соның арқасында қиындықтарды еңсеріп, төтенше жағдайда адам өмірін сақтап қалып жүр. Бүгін ол Төтенше жағдайлар министрлігінің 30 жылдығына арналған шеруді бастап барады.

Әр секундтың маңызын терең түсінетін басшы өзінен кейінгі жастарға ақыл айтудан шаршамайды. Бүгін өткенге сәл шегініс жасап, алғашқы көлігімен өрт сөндіруге аттанды.

Болат Нұрдыбаев, ТЖД басқарма бастығы:

- Міне, осы көлікте жастық шағымыз өтті. Естеліктер ойға оралады. Мына өрт сөндіру көлігін шамамен 15 жылдай тізгіндеппін.

Болат Нұрдыбаев талай оттың ортасында болды. 1997 жылы «Семей орманы» резерваты аумағындағы өртті сөндіруге қатысты. Сол кезде тілсіз жау 120 гектардан астам алқапты шарпыды. Өрт сөндірушілер бір апта бойы күн-түн демей отпен күресті.

Болат Нұрдыбаев, ТЖД басқарма бастығы:

- Жұмысқа алғаш келген күн әлі көз алдымда. Қазір оқтай зулап 30 жыл өтіпті. Бұл жай сан емес. Осы жылдардың ішінде түрлі оқиға, небір қиын жағдай мен әдемі естеліктер бар. Қызметте жүріп ұққаным, өрт сөндіру ісі – нағыз ғылым. 

Полковник Нұрдыбаев қазір де кез келген төтенше жағдайға әзір. Мамандығына деген махаббатын жоғалтқан емес. Әріптестері арасында абыройлы.

Дастан Сейілғазинов, Асу-Бұлақ өрт сөндіру бөлімінің бастығы:

- 15 жыл бойы қоян-қолтық жұмыс істеп келеміз. Осындай кәсіби маманмен бір салада еңбек ету мен үшін қуаныш. Білгенін үйретуден жалыққан емес. Жастарға үнемі жол көрсетіп жүреді. 

Өрт сөндіру қызметі қателікті кешірмейді. Себебі төтенше жағдай болса, өзгенің өмірі үшін күресу керек, дейді Болат Нұрдыбаев.

Асланбек Шығыр, Вячеслав Ветлугин, Дмитрий Пыхтин