ШҚО да қыста төтенше жағдайлар кезінде жедел әрекет ету үшін 900 ден астам техника әзірленді

Синоптиктердің болжамына сәйкес, қыс кезінде өңірде ауа райы құбылмалы болады. Жылдамдығы секундына 20 метрге дейін жететін қатты жел соғады. 

— Шығыс Қазақстанда көлік жолдарын қысқы күтімге дайындау үшін 957 техника дайындалып, қалалар мен аудандарға климаттық ерекшеліктеріне сәйкес тең бөлінген. Республикалық маңызы бар жолдарға «ҚАЖсервис» ЖШС ШҚОФ-ның 103 техникасы қызмет көрсетеді. Облыстық маңыздағы жолдарды күтіп-ұстауға «ОблШығысЖол» ЖШС-ның 119 техникасы тартылады. Аудандық жолдар мен елді мекендердің көшелерінде 735 техника жұмыс істейді, — деп хабарлады ШҚО ТЖД баспасөз қызметінен.

Сондай-ақ 140 мың литр жанар-жағармай мен көктайғаққа қарсы материалдар, 50 тонна техникалық тұз және 800 тонна көмір дайындалған. 

— Төтенше жағдайлар болып жатса жедел әрекет ету үшін 7865 адам және 913 техника, оның ішінде қар тазалау, инженерлік және эвакуациялық техника сақадай сай. 7 жылыту пункті және Привольное ауылында 1 трассалық медициналық-құтқару пункті жұмыс істейді, — делінген ақпаратта.

Еске салсақ, осыған дейін СҚО-да қыс қарсаңында 4 мың шақырым жол тексеріліп, бірқатар кемшілік анықталғаны хабарланған.