Төтенше жағдайлар министрлігіне 30 жыл

Биыл отандық төтенше жағдайлар қызметіне 30 жыл толды.

Ширек ғасырдан астам уақыт ішінде министрлік құтқарушыларды, өрт сөндірушілерді және медицина қызметкерлерін біріктіретін заманауи көпбейінді жүйеге айналды. Жүздеген мың оқыс оқиғалардың алдын алып, миллионға жуық адамға көмек көрсетті.

Бұл бейнежазба Алматы облысының Орджоникидзе шыңында түсірілген. Құтқару операциясы кезінде тікұшақты тәжірибелі ұшқыш Андрей Бухал басқарған. Ол күшті жел мен күннің суықтығына және жоғары ауа қысымына қарамастан тәуекелге барып, әуе техникасын 4410 метр биіктікте орнынан қозғалтпай ұстап тұрған. Маманның асқан біліктілігінің арқасында экипаж зардап шеккен альпинисті сәтті құтқарды.

Андрей Бухал, «ҚазАвиаҚұтқару» АҚ ұшқыш-нұсқаушысы:

- 12 тамызда біз Орджоникидзе шыңынан аяқ жарақаты бар алпинисті қауіпсіз жерге түсірдік. Осы сәтті пайдаланып мен өз экипажыма алғыс білдіремін. Екінші ұшқыш Анаят Әкімовке, инженер Өзбек Ташкенге және басқа да құтқарушыларға бірлескен жұмысы үшін рахмет айтамын. Үйлесімді операция нәтижесінде адам өмірін сақтап қала алдық.

Бейбіт күннің тағы бір батыры Қанат Сәрсенғали. Төтенше жағдайлар қызметінде еңбек етіп жүргеніне 20 жылдан асты. Талай мәрте тілсіз жаудан бірнеше адамның өмірін аман алып қалған. Еңбегі еленіп, президент қолынан «Ерлігі үшін» медалімен марапатталды.

Қанат Сәрсенғали, БҚО ТЖД № 6 өрт сөндіру бөлімінің бөлімше командирі:

- Біз үшін үлкен мәртебе біздің еңбегімізді елеп жатыр. Мемлекет басшымыз үлкен марапат жасады. Өте қуаныштымын. 30 жылдыққа байланысты құтқарушылар күніне жасап жатқан басшылық құрамға рахметімді айтамын.

Әдетте құтқарушылар өз кәсібилігін іс жүзінде дәлелдегенді құп көреді. Мақтанудан ада. Ерліктерін де көп айта бермейтіні сондықтан.

Шынболат Әзімбаев, Жамбыл облысы ТЖД Өрт сөндіру кезекші қызметінің жедел-кезекшісі:

- Мен үшін бұл үлкен сый - абырой болды. Сөзбен жеткізу мүмкін емес, қуаныштымын. Басшылық құрамға рахмет. Еңбек бағаланды деп ойлаймын.

Сырым Жаймағамбетов, Атырау облысы ТЖД бастығының орынбасары:

- 2025 жылы наурыз айында «ЕмбіМұнайГаз» АҚ-ның ұңғымасында газ-мұнай атқылауының авариялық жұмыстарына қатысып, жою жұмыстарына атсалыстым.

Еліміздің Төтенше жағдайлар министрлігінде 30 мыңға жуық қызметкер жұмыс істейді. Оның ішінде 22 мыңы - құтқарушылар. Өзгенің өмірін құтқарамын деп ерлікпен қаза тапқан 72 батырымыз бар. Бүгінгі айтулы датаға орай, өз басын қатерге тігіп жүрген батыл жандарға мың алғыс айтамыз!

Авторлары: Мирлан Алтынбек, Асхат Қарақойшиев, Дмитрий Димитриев