Семейде төтенше жағдайлар мамандары рейд жүргізді

Абай облысында өткен жылыту маусымында 304 өрт оқиғасы тіркелді. Бұл алдыңғы кезеңмен салыстырғанда 44 пайызға көп. Құтқарушылардың айтуынша, негізгі себеп – тұрғындардың пеш және электр жабдықтарын дұрыс пайдаланбауы. Осыған байланысты олар өрттің алдын алу шараларын күшейтіп, арнайы рейдке шықты. 

Облыс аумағында 122 мыңнан астам үй бар. Олардың басым бөлігі – жер үй. Төтенше жағдайлар департаменті баспаналарда өрт қауіпсіздігін күшейту үшін жоспарлы және рейдтік тексеріске шықты. 

Ерасыл Кәдірбеков, ТЖД мемлекеттік өрт бақылау басқармасының бас маманы:

- Өрттің ең бас себептері жаңағы пешті дұрыс қолданбау. Электр тоқтарын, өрт қауіпсіздік ережелерін бұзу болып табылады. Сол себептен біздің тұрғындарға айта кетсем. Өрт қауіпсіздік ережелерін сақтап, пешті үнемі дұрыс қалпына келтіру және сақтау. Балаларды жалғыз қалдырмауды сұраймыз. 

Соңғы үш жылда әлеуметтік осал санаттағы отбасылардың үйлеріне 15 мыңнан астам дабыл беретін датчик орнатылды. Тек биылдың өзінде 1800-ден астам осындай қондырғы қойылды. Мамандардың айтуынша, уақытылы іске қосылған бұл датчиктер 21 адамның, соның ішінде 10 баланың өмірін сақтап қалды.

Әйгерім Жақпарова, қала тұрғыны:

- Ол кісілерге көп-көп рақмет. Халықтың қамын ойлап біз сияқты отбасыларға көмектесіп, жағдайымызды жасап жатқанына көп рақмет.

Жылыту маусымы кезінде тек құтқарушылар емес, волонтерлер де қауіпсіздік науқандарына атсалысып жатыр.

Аружан Айбекова, волонтёр:

- Ерікті ретінде ТЖД бірге қазір жылыту маусымына байланысты әлеуметтік шектеулі және көпбалалы отбасыларға қысқа дайындық жұмыстарын жүргізіп жатырмыз. 

Жылыту маусымына дайындық аясында алты мыңға жуық үй тексерілді. Оның нәтижесінде 2700-ге жуық тұрғын өрт қауіпсіздігі ережесін бұзғаны үшін ескерту алған. Арнайы жадынамалар таратылып, тоғыз мыңнан астам адамға нұсқама берілді. 

Авторлары: Рүстем Қайратұлы, Мәди Базарбеков