Шымкент қалалық полиция департаментінің жаңа басшысы тағайындалды

Шымкент қалалық полиция департаментінің жаңа басшысы тағайындалды. Бұл қызметке Мұхтар Қожаев келді, деп хабарлайды Arasha.kz.

Ішкі істер министрі Ержан Сәденов Шымкент қаласының полиция департаментінде көшпелі кеңес өткізіп, жеке құрамға жаңа басшыны таныстырды.

Ресми мәліметке сәйкес, Шымкент қалалық полиция департаментінің бастығы болып бұған дейін ІІМ Тергеу департаментін басқарған Мұхтар Қожаев тағайындалды. Ведомство генерал-майорының басқарушылық және тергеу саласында мол тәжірибесі бар екені атап өтілді. Ол еңбек жолын тергеушіден бастап, орталық аппараттағы департамент басшылығына дейін көтерілген.

Мұхтар Қожаевтың өмірбаяны

Мұхтар Қожаев 1999 жылы ҚР ІІМ Алматы заң институтын тәмамдаған. Қызмет жолын Маңғыстау облысы Ақтау қалалық ішкі істер бөлімінде қарақшылық пен тонау істерін тергеу тобының тергеушісі ретінде бастаған.

2001 жылдан бастап Ақтау қалалық ішкі істер басқармасында анықтау және тергеу бөлімдерін басқарды, кейін тергеу жөніндегі басқарма басшысының орынбасары қызметін атқарды.

2010 жылдан бастап Маңғыстау облысы ішкі істер департаментінің аудандық бөлімдері мен басқармаларын басқарды.

2012 жылы ҚР ІІМ Тергеу комитетінде аймақтық бақылау және алдын ала тергеуді ұйымдастыру басқармасы бастығының орынбасары болды.

2017 жылдан бастап ІІМ Тергеу департаментінің алдын ала тергеуді аймақтық бақылау басқармасын басқарды.

2018 жылы Қостанай облысы полиция департаменті бастығының орынбасары қызметіне тағайындалды.

2018 жылғы желтоқсаннан бастап ҚР ІІМ Тергеу департаменті бастығының орынбасары болды.

Ал 2023 жылдың желтоқсан айынан бері ҚР ІІМ Тергеу департаментінің басшысы қызметін атқарып келді.