Шымкентте 69 млрд теңгелік заманауи жылыжай кешені салынады

Қазақстанда құны шамамен 69 млрд теңге болатын ірі жылыжай жобасы іске асырылады.
Польшадағы Fabe Polska компаниясы алдағы бес жылда елдің агроөнеркәсіптік кешеніне 137 млн АҚШ доллары көлемінде инвестиция салуды жоспарлап отыр.

Келісімге Ауыл шаруашылығы министрі Айдарбек Сапаров пен компанияның басқарма төрағасы Фатих Будан қол қойды. Жоба аясында Шымкент қаласында жылына 38 мың тонна қызанақ өндіретін заманауи жылыжай кешені салынады.

Министрдің айтуынша, жоба импортты алмастыруға, экспорттық әлеуетті арттыруға және аграрлық секторға инвестиция тартуға ықпал етеді. Ал инвестор тарапынан өндірісте заманауи агротехнологиялар мен энергия үнемдейтін шешімдер қолданылатыны айтылды.

Жоба іске қосылғаннан кейін ішкі нарықты сапалы өніммен тұрақты қамтамасыз ету көзделіп отыр.