9,5 млрд теңгелік жоба: Алматы облысында ірі өңдеу кешені іске қосылды

Алматы облысында жеміс-көкөніс өнімдерін терең өңдеуге маманданған жаңа өндірістік кешен іске қосылды.
Қазақстанда баламасы жоқ кәсіпорын жылына 70 мың тоннаға дейін ауыл шаруашылығы шикізатын өңдеуге қауқарлы.

Жоба Мемлекет басшысының экономиканы әртараптандыру, өңдеу өнеркәсібін дамыту және экспортқа бағытталған өндірістерді қолдау жөніндегі тапсырмалары аясында жүзеге асырылды. Кәсіпорын қазақстандық «Alpecon Group» серіктестігі мен Түркияның жетекші азық-түлік өндірушілерінің бірі Göknur Gıda компаниясының бірлескен инвестициясы негізінде салынған.

Жобаның жалпы құны 9,5 млрд теңгені құрайды. Өндірістік кешен 30 гектар аумақта орналасқан. Зауытты дамыту екі кезең бойынша жүзеге асырылады.

Бірінші кезеңде кәсіпорын жыл сайын 70 мың тоннаға дейін жеміс-көкөніс шикізатын өңдеп, 13 мың тонна концентрленген шырын, пюре және паста өндіреді. Дайын өнімнің негізгі бөлігі шетел нарықтарына экспортталмақ. Оның ішінде Түркия нарығы негізгі бағыттардың бірі ретінде қарастырылып отыр.

Жобаның екінші кезеңінде алма өңдеуден қалған қалдықтардан пектин өндіру қолға алынады. Пектин – кондитерлік, фармацевтикалық және тағам өнеркәсібінде кеңінен қолданылатын жоғары сұранысқа ие өнім. Қазіргі таңда мұндай өндіріс әлемнің санаулы елдерінде ғана дамыған. Олардың қатарында Қытай, Германия және АҚШ бар.

Жоспарға сәйкес, кәсіпорын жыл сайын 1000 тоннаға дейін пектин және 3000 тонна алма талшығын өндіреді. Бұл өнімдер Оңтүстік Корея мен Жапония нарықтарына экспортталмақ.

Бүгінде зауытта 100-ден астам тұрақты жұмыс орны құрылған. Компания өкілдерінің айтуынша, өндіріс көлемінің ұлғаюына байланысты жаңа жұмыс орындары кезең-кезеңімен ашылады.

«Alpecon Group» серіктестігінің бас директоры Самат Балабековтің айтуынша, инвесторлардың ұзақ мерзімді мақсаты – 2028 жылға қарай Қазақстандағы алғашқы толық циклді агроөнеркәсіптік кластерді қалыптастыру.

«Бұл кластер ауыл шаруашылығы өнімдерін өндіруден бастап оларды терең өңдеу, цифрлық технологияларды енгізу, мамандар даярлау, ғылыми зерттеулер жүргізу және экспорттық бағыттарды дамыту сияқты барлық кезеңдерді қамтиды», – деді ол.

Компания сондай-ақ Жетісу облысынан Түркістан облысына дейін ауыл шаруашылығы өнімдерін қабылдау бекеттерінің желісін құруды жоспарлап отыр. Бұл фермерлердің өнімдерін өткізу мүмкіндігін кеңейтіп, өңірлердегі агроөнеркәсіптік кооперацияның дамуына серпін береді.

Сарапшылардың пікірінше, жаңа зауыттың іске қосылуы Қазақстанның өңдеу өнеркәсібіндегі импортқа тәуелділікті азайтып, отандық өнімнің экспорттық әлеуетін арттыруға мүмкіндік береді. Сонымен қатар ауыл шаруашылығы шикізатын терең өңдеу арқылы қосылған құны жоғары өнім өндіру көлемі ұлғайып, өңір экономикасының дамуына жаңа серпін береді.