Шымкентте батпырауықтар фестивалі өтті

Шымкентте Республика демалыс күндерді көңілді өткізу мақсатында батпырауықтар фестивалі ұйымдастырылды.

Ашық аспан астындағы шараға креативті индустрия өкілдері де қатысып, ерекше жобалар ұсынылды. Қолөнер шеберлерінің көрмесі мен жастар арасындағы сайыстар фестивалге шығармашылық сипат берді.

Фестивалге қатысушыларды көңілді әуеннің ырғағымен анимациялық кейіпкерлер қарсы алды. Балалар үшін ерекше қойылымдар ұйымдастырылып, батпырауықтар ұсынылды. Әуеге ашық реңк алған түрлі пішіндегі мыңнан астам желқабыз ұшырылды.

Әсел Есмағұлова, қала тұрғыны:

- Өте керемет атмосфера. Балалар мәз. Ересектер де балаша қуанып жүрміз. Көбірек өтіп тұрса, әрине нұр үстіне нұр. Адам лық толы көріп тұрсыздар. Сондықтан әлі батпырауық қолымызға тимеді. Бірақ ұшырғымыз келеді.

Тұрғындарға көңілді демалыс сыйлау үшін креативті индустрия өкілдері де арнайы бағдарлама әзірледі. Қолөнер шеберлерінің көрмесі, велоәуесқойлар арасында жарыс және көше биінен қызу сайыс ұйымдастырылды. Ал фестиваль аясындағы мото-маусымның жабылу салтанатына орталық Азия елдерінен 200-ден астам байкер шақыртылды.

Шерзод Асатуллаев, байкер:

- Әсеріміз өте тамаша. Бұған дейін мото-маусымның аясы тар еді. Екі доңғалақты көлік құралына қызығушылардың ғана шеруі болатын. Ал қазір бәрі басқаша. Балалар да оның ата-анасы да бақытқа бөленіп, көңіл көтеріп жүр. Қатысқанымызға қуаныштымыз.

Отбасылық демалысты қолдауға, балалардың бос уақытын тиімді өткізуге арналған фестивальде өзара үздіктер анықтылды. Қатысушылардың батпырауықтары арасында «ерекше дизайнға ие» әрі «ең үлкені» жоғары бағаланып, арнайы сый-сияпат жасалды.

Ерлан Омаров, «Visit Shymkent» туристік ақпарат орталығының басшысы:

- Қосымша ақпараттық тур ұйымдастырып жатырмыз. 30 инфлюэнсер, travel-блогерлер, телеарналар. Оның ішінде 17 -қазақстандық, 10 - Әзербайжаннан, Ресейден және Өзбекстаннан келді.

Енді туризмді дамыту тұжырымдамасына сәйкес мәдени, экологиялық және гастрономиялық фестивалге батпырауықтар мен әуе шамдары шарасы енді. Ал бұл күні Достық үйінде этносаралық татулыққа негізделген іс-шара мен саябақ, гүлзарларда концерттік кеш өтті.

Авторлары: Нұрсұлтан Мұхамеджан, Нұрмахан Мұсатов