Парижде қазақ киносының фестивалі өтті

Парижде қазақ киносының фестивалі өз мәресіне жетті. Отандық туындыларды екі мыңнан астам адам тамашалады. Жетінші кинофестиваль Франция астанасының тарихи орталығында өтті. Париж жұрты қазақстандық киноиндустрияның бай әрі сан алуан жанрларымен танысты. Талғамы биік көрермен қазақ киносын қалай қабылдады?

Франциялық көрерменге қазақстандық кино таңсық емес. Мұнда отандық фильмдердің фестивалі осымен жетінші рет ұйымдастырылып отыр. Бұл жолы айтулы шара Espace Saint Michel ежелгі кинотеатрында Қазақстанның Франциядағы елшісінің қолдауымен және франциялық Peptitalents кинофестивалімен серіктестік аясында өткізілді. Кинокөрсетілімдер бес күн ішінде екі мыңнан астам көрермен жинап үлгерді.

Андрэ Иванов, Халықаралық қазақ киносы фестивалінің негізін қалаушы:

- Биыл фестивальді жаңа форматта өткіздік. Көрсетілім санын азайттық. Нант, Леон, Канн қалаларының тұрғындары да қазақстандық киноны тамашалауға мүмкіндік алу үшін Франциядағы қала санын көбейттік. Бұдан өзге Камерун, Марокко, Люксембург, Бельгия, Швейцария сынды 11 елде ұйымдастыруға ниеттіміз.

Фестиваль бағдарламасында халықаралық марапаттарға ие болған режиссер Елзат Ескендірдің «Әбіл» фильмі, француз-қазақ киноөндірісінің ортақ жемісі «Махаббат алмасы», Әділхан Ержановтың «Кадет» драмасы бар. Сондай-ақ «Мадина» фильмі мен халық арасында зор сүйіспеншілікке бөленген «Әміре» және «Бақыт құшағында» туындылары көрсетілді.

Биыл қазақтың біртуар перзенті Әміре Қашаубаевтың Париждегі ЭКСПО көрмесінде ән салғанына 100 жыл. Дәл осы айтулы датада әншінің құрметіне түсірілген фильмнің көрсетілімі Қазақстанның Франциядағы елшілігінде өтуі ерекше символикалық мәнге ие. Әміре Қашаубаев алғаш болып шетелдік тыңдарманға халық әнін паш етті. Сол күннен бері ғасыр өтсе де Франция тұрғындары арасында әйгілі әншінің шығармашылығына қызығушылық танытатындар көп.

Фредерик, көрермен:

- Бұл фильм жүрегімнен ерекше орын алды. Керемет эмоция сыйлады. Сол кезеңнің тұрмыс-тіршілігі, Қазақстандағы әлеуметтік-саяси жағдай жақсы суреттелген. Әміре Қашаубаевтың орындауындағы әнді терең сезіндім. Жүректі шымырлатып, қазақ музыкасының бірегейлігін жеткізді.

Фестиваль режиссер Санат Сапашев таспалаған Қазақстандағы алғашқы джукбокс-мюзикл «Бақыт құшағында» туындысымен қорытындыланды. Қазақ вальсінің королі Шәмші Қалдаяқовтың әсем әндері франциялық көрерменнің ыстық қошеметіне бөленді.

Эмильен, көрермен:

- Фильмде қазіргі Қазақстанның келбеті көрініс тапқан. Астананың сұлулығы барынша әдемі суреттелген. Маған қатты ұнады.

Карин, көрермен:

- Шынымды айтсам, мен Қазақстанда танымал болып жатқан бұл фильмдер туралы білмеген едім. Өзім үшін жаңа дүниелер ашып жатқаныма қуаныштымын. Фестивальдің ұйымдастырылуын жоғары бағаладым. Күн сайын әр түрлі фильмдер көрсетілді. Осыдан-ақ сіздердің елдеріңіздің мәдениетті қаншалықты бай екенін байқауға болады. Маған әйел тағдырын баяндайтын «Мадина» фильмі қатты ұнады.

Фестиваль – жай ғана көрсетілім емес, бұл идея мен тәжірибе алмасу, жаңа мүмкіндіктер. Жас кинематографистерды даярлап шығару үшін Қазақстандағы Нью-Йорк киноакадемиясы шараны ұйымдастырушыларға үш грант табыстады. Ал фестиваль мұнымен аяқталмайды. Алдағы уақытта отандық кинокартиналармен Францияның өзге қалаларының тұрғындары және тағы да бірқатар еуропалық елдің көрермендері жақынырақ танысады.

Авторлары: Мөлдір Жақан, Айдана Кәріпжанова, Руслан Өміржан