Астана Операсында қазақ киносының музыкасы шырқалды

Шара қазақ киносының үздік әуендеріне арналды. Авторлық жобаның жетекшісі музыкант әрі дирижер Алихан Идрисов. Ол бұған дейін көпшілікке танымал «Мелодия экрана» жобасының авторы ретінде де белгілі.

— Бұл идея менің студент кезімде, шамамен 19-20 жасымда пайда болды. «Пираты Карибского моря» фильмін көріп отырғанда бәрі сюжетке көңіл бөлсе, мен музыкасына, оркестрдің қалай ойнағанына құлақ түрдім. Сол сәтте кино музыкасын сахнаға шығару ойы келді, — деді Алихан Ерланұлы.

Фото: Виктор Федюнин/ Kazinform

Маэстро алғашқы концертін осы театр сахнасында ұйымдастырған. Ол кезде экранды да өз қаржысына жалға алып, бағдарламаны небәрі 10 нөмірмен жасаған.

Алихан Идрисовтың айтуынша, жобаға деген қызығушылық жыл сайын артып келеді. Бұл жолғы концерт бағдарламасына «Қыз Жібек», «Менің атым Қожа», «Брат или брак», «Рэкетир», «Станция любви», «Ангел в тюбетейке» сынды фильмдердің музыкасы енген. Барлық оркестрлік өңдеулерді автордың өзі жасаған.

— Концертте оркестрдің әр аспабын көрсетуге тырыстым. Сахнада флейта, саксофон, кларнет, тіпті домбыра да жеке ойналады. Мысалы, «Қыз Жібек» фильмінде домбыра үні маңызды рөл атқарады, сол атмосфераны дәл солай жеткізуге тырыстым, — деді ол.

Маэстроның жұбайы Жазира Нұржаупова да шығармашылық жолдағы серігін қолдап келеді. Оның айтуынша, жастардың театрға қызығушылығы соңғы жылдары айтарлықтай артқан.

Фото: Виктор Федюнин/ Kazinform

— Бірнеше жыл бұрын үлкен залда өткен концертте зал лық толы болды. Тіпті қыс мезгілінде далада адамдар қосымша орын сұрап тұрды. Көрерменнің көбі — жастар. Әркім экрандағы фильмнен өз естелігін тауып, біреулер көз жасын тыя алмады, енді біреулер билеп отырды. Сол эмоция — маэстро үшін ең үлкен марапат, — деді ол.

Фото: Виктор Федюнин/Kazinform

Алихан Идрисов алдағы жылы да музыка мен киноны тоғыстырған жаңа жобасын ұсынуды жоспарлап отыр.

— 2026 жылдың көктемінде тағы бір ерекше жоба болады. Бұл жолы басқа формат, басқа орындаушылар қатысады. Бірақ тақырып сол — музыка мен кино байланысы, — деді музыкант.

Фото: Виктор Федюнин/ Kazinform

Айта кетейік, «Астана Балет» театры халықаралық фестивальде күміс жүлдеге ие болғанын хабарлаған едік. 

Кәмилә Мүлік