ШЫҰ: инвестициялық ынтымақтастық

Қытайда Шанхай ынтымақтастық ұйымына мүше елдердің ішінде Қазақстан инвестициялық тартымдылығы ең жоғары мемлекет саналады.

Жергілікті кәсіпкерлердің қызығушылығын тудырып отырған фактор көп. Олар әсіресе жасыл энергия саласын белсенді инвестициялауға дайын. Бұл туралы Бейжің қаласында өткен ынтымақтастық форумы кезінде айтылды.

Форум ШЫҰ деңгейінде алғаш рет ұйымдастырылып отыр. 300-ге тарта бизнес өкілдерінің басын қосқан жиында тараптар ашық диалог жасады. Әр ел өз мүмкіндігін көрсетті.  Біздің мемлекеттің инвест әлеуетін Қытайдағы төтенше және өкілетті елші таныстырып, Қазақстанда инвестициялау тиімділігінің басты 5 себебін атады.

Шахрат Нұрышев, Қазақстан Республикасының Қытай Халық Республикасындағы Төтенше және өкілетті Елшісі:

- Қазақстан Орталық Азиядағы ең ірі экономика. Екіншіден Қазақстанның инвестициялық климаты ең қолайлы ел. Үшіншіден, шетелдік инвесторлардың құқығын қорғау механизмі қалыптасқан. Бұл аса маңызды. Сондай-ақ Қазақстан мен Қытай арасында өзара инвестияларды қорғау жөніндегі ынтымақтастық жаңартылып, жаңғыртылды. Және Қазақстан Қытаймен мәңгілік жан-жақты стратегиялық серіктестік орнатқан әлемдегі жалғыз мемлекет. 

Қытайлықтар үшін Шанхай ынтымақтастық ұйымының төңірегіндегі 27 елдің ішінде инвестициялық тартымдылығы ең жоғары мемлекет бұл - Қазақстан. Бұл туралы Қытайдың шетелдегі кәсіпорындарды дамыту жөніндегі қауымдастығының президенті Хэ Чжэньвей мәлімдеді. Оның айтуынша «би ту би» кездесулер барысында кәсіпкерлердің дені Қазақстанға тіркелген. 

Хэ Чжэньвей, Қытайдың шетелдегі кәсіпорындарды дамыту қауымдастығының президенті:

- Компаниялардың өтініштерін қабылдаған адам ретінде айтайын, Қазақстанға жазылу үшін кәсіпкерлер кезекке тұрды. Бұлай болуы заңды. Өйткені бұған дейінгі инвесторлар Қазақстанда жобаларын сәтті жүзеге асырды. Бұл бизнес ортада сенімді арттырды. Оның үстіне сіздің елде сұраныс жоғары. Бұл да әсер етті деп ойлаймын.

Бүгінде қазақ-қытай арасында бірлескен 270 инвестициялық жоба бар. Олардың жалпы құны 75 миллиард АҚШ доллар. Бұл форумда энергетика, ауыл шаруашылығы әсіресе жаңартылған энергияға қатысты жобаларды ұсынушылар көп болды.

Хэ Чжэньвей, Қытайдың шетелдегі кәсіпорындарды дамыту қауымдастығының президенті:

- Қытайдың ішінде бәсекелестік тым жоғары. Кәсіпкерлердің үнемі нарық іздейтіні содан. Қазір олар жаңа өндіріс орындарын ашып, оған  өз қаржысын жұмсауға дайын. Қазақстан арқылы Орталық Азия елдеріне жол ашылады. Тіпті өнімдерді Еуропаға шығаруға мүмкіндік бар. Мұны біздің кәсіпкерлер жақсы біледі. Бүгінгі форум тікелей байланыс орнатуға бағытталған маңызды алаң.

Қазақ-қытай арасында экономикалық ынтымақтастық жылдан жылға нығайып келеді. Екі ел арасындағы тауар айналымы кейінгі 9 айда 35,4 млрд доллар болды. Мамандар егер осы сауда-саттық динамикасы жыл соңына дейін сақталса, бұл көрсеткіш 50 млрд АҚШ долларға жетеді деген болжам айтты. 

Руслан Бақытбекұлы, Мадияр Ерсайын