Сингапурде ер адам елге 52 грамм героин әкелгені үшін өлім жазасына кесілді

Елдің Орталық есірткі бюросы Паннир Сельвам Прантаман Сингапурге кем дегенде 51,84 грамм героин әкелгені үшін сотталғанын мәлімдеді. 

2014 жылдың 3 қыркүйегінде Паннир мотоциклімен Вудлендс бақылау-өткізу пункті арқылы өтіп бара жатқанда оны миграция және бақылау-өткізу бекетінің қызметкерлері кездейсоқ тоқтатқан. Мотоциклдің артқы орындығының багажынан бір пакет ұнтақ табылды. Одан бөлек күдіктінің шап аймағынан үш пакеттегі ұнтақ тәркіленді. 

Сингапурдің есірткіні теріс пайдалануға қатысты заңында (MDA) импортталатын заттың мөлшері 15 грамнан асса, өлім жазасы қарастырылады.

– 51,84 грамм диаморфин бір апта ішінде шамамен 620 нашақордың тәуелділігін қанағаттандыруға жеткілікті, - делінген бюро мәлімдемесінде. 

Сотталған азамат бірнеше рет апелляциялық шағым түсірген. Оған қоса Паннирдің ел президентіне кешірім жасау туралы 6 өтініші де қабылданбапты.

– Сингапурде өлім жазасы тек жеке нашақорларға ғана емес, сонымен бірге олардың отбасыларына және тұтастай қоғамға зиян келтіретін есірткінің айтарлықтай мөлшерін әкелу немесе сату сияқты аса ауыр қылмыстар үшін тағайындалады, - деп атап өтті бюро. 

Еск сала кетсек, бұған дейін Қырғызстан президенті елдегі сот жүйесіне өлім жазасын енгізуді бұйырғанын хабарлаған едік.