Солтүстік Қазақстан облысында рекордтық көлемде астық жиналды

Солтүстік Қазақстан облысында рекордтық көлемде астық жиналды.

Жергілікті диқандар  биыл егіс алқабының әр гектарынан 20 центнерден бидай жинады. Ауыл шаруашылығы басқармасы берген соңғы мәлімет бойынша бүгінгі таңда өңірде 6 млн 300 мың тонна егін жиналды.

Биыл Солтүстік Қазақстан облысында 4,5 млн гектар жерге дән себілді. Орақ науқаны аяқталуға жақын. Диқандар орташа есеппен гектарынан 20 центнерден бидай жинап, жоғары көрсеткішке қол жеткізді. 

Елтай Зікірин, "Полтавское" ЖШС директоры:

- Кейбір егін алқаптары 60 центнерден өнім берді. Майлы дақылдар да мол болды. Соңғы жылдары ауыл шаруашылығы саласына Үкімет тарапынан бұрын – соңды болмаған қолдау көрсетіліп жатыр. Диқандарға көктемгі дала жұмыстарын жүргізуге төменпайыздық несие берілді.

Биыл орақ науқанына Үкіметтен 82 мың тонна жанар-жағармай бөлінді. Оның бір бөлігі егінді кептіруге үлестірілді. Қазір облыс бойынша 900 мың тоннаға жуық майлы дақыл жиналды.

Сергей Звольский, "Астық - STEM" ЖШС Директоры:

- Қазір майлы дақылдарға басымдық беріп жатырмыз. Биыл рапс жақсы шықты. Әр гектарынан 3 тоннадан өнім түсті. Картоп, сәбіз де мол болды. Ал, бидайдың сапасы өте жақсы. Бұл мемлекеттің зор қолдауы арқасында деп білеміз. 

Биыл Мемлекет басшысының тапсырмасымен солтүстік қазақстандық диқандарға 160 млрд теңге қаржылай көмек көрсетілді. Шаруалардың айтуынша, бұл бұрын-соңды болмаған қолдау. 

Павел Рафальский, "Vishnevskoe GCK" ЖШС директоры:

- Мемлекеттің қолдауы өте зор. Қазір миниралды тыңайтқыштардың басым бөлігі субсидияланады. Одан бөлек «Кең дала» бағдарламасы бойынша егін себу кешендері мен тракторлар сатып алдық. 

Қазір облыс бойынша 6,3 млн. тонна бидай бастырылды. Өңірде оны сақтауға толық мүмкіндік бар. Астықты 45 элеватор қабылдайды. 

Айдарбек Айтмұхамбетұлы, Қуаныш Қазбеков