Сот шешімін жою үшін 10 млн доллар ұсынды : Шымкенттегі су мекемесі желідегі ақпаратқа жауап берді

Компания бұл хабарламаларды ақпараттық шабуыл деп атап, олардың ешқандай дәлелі жоқ екенін мәлімдеді.

Интернетте Шымкент су арнасына қатысты сот процесіне ықпал ете алатын делдалдарды іздеу туралы жазбалар пайда болған. Онда «мәселені шешу» үшін 10 млн доллардан астам қаржы және Ramada by Wyndham Shymkent қонақүйі ұсынылуы мүмкін деген болжам айтылған.

Кейбір жарияланымдар бұл жағдайды кәсіпкер, бұрын Шымкент қаласының екі рет әкімі болған Анарбек Орманның есімімен байланыстырады. Жазбаларда 1990-жылдардың соңында қаланың су инфрақұрылымы жекешелендіріліп, оның бақылауы А.Орманға қатысы бар «Су ресурстары — Маркетинг» ЖШС-не өткен деген пікірлер айтылған.

Ал компания Kazinform агенттігінің ресми сауалына берген жауабында мұндай жарияланымдардың ешқандай дәлелге негізделмегенін және қоғамда теріс пікір қалыптастыруға бағытталғанын мәлім етті.

— Сот шешімін ірі сыйақы арқылы жоюға әрекет жасалды деген дереккөздерге жасалған сілтемелердің ешқайсысы нақты дәлелмен расталмаған. Бұл — қауесеттер мен жалған ақпараттардың таралуы, — деп хабарлады «Су ресурстары — Маркетинг» мекемесі.

Компанияның пікірінше, мұндай жарияланымдар сотқа қысым көрсету әрекеті болуы мүмкін.

— Мұндай материалдар ақпараттық шабуылға ұқсайды және сот органдарына қоғамдық қысым көрсету арқылы олардың заңды әрі объективті шешім қабылдауына әсер етуге бағытталған, — деді компания өкілдері.

Сондай-ақ компания сот шешімдері әлеуметтік желілердегі немесе Telegram-арналардағы жарияланымдардың ықпалымен емес, тек заң мен нақты дәлелдерге сүйене отырып қабылдануы тиіс екенін атап өтті.

«Су ресурстары — Маркетинг» ЖШС бұл істің әділ әрі тәуелсіз қаралатынына сенім білдірді.

— Қорытынды сот шешімі тек құқықтық нормаларға сай және әділдік қағидаттарына сәйкес қабылданады деп сенеміз, — деп нақтылады компания.

Еске салайық, Шымкенттегі ең ірі су жеткізуші оператор — «Су ресурстары — Маркетинг» ЖШС төңірегіндегі дау бірнеше жылдан бері жалғасып келеді. Компания қаланың су жүйесін 2000-жылдардың басынан бері басқарады. Мекеменің шамамен 22 пайыз акциясы мемлекетке тиесілі.

Соңғы жылдары билік органдары сот арқылы су инфрақұрылымының бір бөлігін мемлекет меншігіне қайтаруға әрекет жасап жатыр.

Шымкент қаласының мамандандырылған ауданаралық экономикалық соты бұған дейін жеке меншікке берілген 6 нысан бойынша аукцион хаттамалары мен сатып алу-сату келісімшарттарын жарамсыз деп таныды. 

Атап айтқанда, Ақбай-Қарасу су алу құрылысының аяқталмаған нысаны, «Бадам-Сайрам», «Қызылсай» және «Тассай» су алу кәсіпорындары, «Транс-Вик» автокөлік цехы мен «Уникан-сервис» кәсіпорны мемлекет меншігіне қайтарылуы тиіс деп шешілді. Алайда «Су ресурстары — Маркетинг» ЖШС бұл шешіммен келіспейтінін білдірді.

Бұған дейін қала билігі мемлекет меншігіне тек су алу нысандарын ғана қайтару жоспарланып отырғанын мәлімдеген. Ал қалған инфрақұрылым — тазарту станциялары, су құбырлары желісі және компанияның өзі жеке басқаруда қалуы тиіс.

Шымкент қаласының әкімі Ғабит Сыздықбеков осы жағдайға қатысты пікір білдіріп, қаланың су жүйесі стратегиялық маңызы бар сала екенін атап өтті. Сондай-ақ ол бұл мәселе бойынша сот шешімін күтетінін айтқан еді.