СҚО да бюджет ақшасы бес жыл бойы есепшінің қалтасына түсіп келген

Солтүстік Қазақстан облысында Мағжан Жұмабаев ауданының Жастар ресурстық орталығы бухгалтері бірнеше жыл бойы бюджет қаражатын өз шотына заңсыз аударып келгені анықталды. Әйел адамға қатысты сот үкімі шықты, деп хабарлайды Egemen.kz.

Фото: Ерлан Омар

Тексеру барысында белгілі болғандай, орталықтың есепшісі 2020 жылдың қаңтарынан 2025 жылдың ақпанына дейін өз атына жалпы сомасы 17 миллион теңге болатын жалақы мен өзге де төлемдерді заңсыз аударып отырған.

Аталған дерек бойынша аудан прокуратурасы Қылмыстық кодекстің 189-бабы 4-бөлігінің 2) тармағы («Сеніп тапсырылған бөтеннің мүлкін иемдену немесе жымқыру») бойынша сотқа дейінгі тергеуді бастаған.

«Мағжан Жұмабаев аудандық сотының 2025 жылғы 29 қыркүйектегі үкімімен есепші кінәлі деп танылып, барлық меншік нысанындағы ұйымдарда материалдық жауапкершілік пен бухгалтерлік қызметке байланысты лауазымдарды атқару құқығынан айыра отырып, 7 жылға бас бостандығынан айырылды. Үкім заңды күшіне енді»,  делінген хабарламада.

Сонымен қатар, сотталушының жас баласы болғандықтан, жазаны өтеу мерзімі 2028 жылдың 27 қыркүйегіне дейін, яғни бала он төрт жасқа толғанға дейін кейінге қалдырылды.

Мемлекетке келтірілген залал ішінара өтелген.