Тай ханшайымы Баджракитиябха 47 жасында қайтыс болды

Таиланд королі Рама X-ның үлкен қызы, ханшайым Баджракитиябха 47 жасында қайтыс болды, - деп хабарлайды Tengrinews.kz тілшісі Euronews-ке сілтеме жасап.

Таиланд королі Рама X-ның үлкен қызы, ханшайым Баджракитиябха 47 жасында қайтыс болды, - деп хабарлайды Tengrinews.kz тілшісі Euronews-ке сілтеме жасап.

Ханшайым бірнеше жыл бойы комада жатты. Ол өкпе мен бүйрек жұмысын жетілдіретін аппараттарға қосылған болатын.

Билік өкілдерінің мәліметінше, дәрігерлер бар күшін салғанымен, оның жағдайы бақылауға көнбеген инфекция салдарынан нашарлап кеткен. Инфекция өмірлік маңызды ағзалардың жұмысына кері әсер еткен.

Ханшайымның денесі қоштасу рәсімі үшін Бангкоктағы Үлкен сарайға қойылады, ал жерлеу рәсімі "корольдік дәстүрлерге сай ең жоғары құрметпен" өтеді.

Таиланд халқы оны ханшайым Па деп таныған. Король Маха Вачиралонгкорнның алғашқы некесінен туған жалғыз қызы 2022 жылғы желтоқсанда денсаулығы күрт нашарлағаннан бері ауруханада жатқан. Сарай мәліметінше, ханшайымнан микоплазмалық инфекция анықталған. Бұл - көбіне пневмониямен байланысты болатын бактериялық ауру.

"Бұл қаза - бүкіл ұлттың жүрегіндегі өлшеусіз қасірет", — деді премьер-министр Анутин Чарнвиракул телеүндеуінде.

Ол ханшайымды "Таиландтың мақтанышы" деп атап, "оның мейірімділік, әділдік пен теңдікке негізделген қоғам құруға деген ұмтылысы ұлттың мәңгі рухани мұрасы, тайлықтардың талай буыны үшін жол көрсетуші шырақ болып қала береді" деп қосты.

Баджракитиябха Тхаммасат университетінде құқықтану мамандығы бойынша білім алып, кейін АҚШ-тағы Корнелл университетінде құқық магистрі және заң ғылымдарының докторы дәрежесін алған.

Оның докторлық диссертациясы айыпталушылардың құқығын қорғауға арналған болатын, ал кейінірек ол түрмедегі әйелдердің жағдайын жақсарту науқанымен айналысып, әйелдерге қатысты зорлық-зомбылыққа қарсы бастамаларды қолдады.