Талдықорғанда италиялық университет филиалы ресми тіркелді

Мемлекет басшысы Қасым-Жомарт Тоқаевтың тапсырмасына сәйкес елімізде жетекші шетелдік жоғары оқу орындарының филиалдарын ашу жөніндегі маңызды бастама Жетісу өңірінде кезең-кезеңімен жүзеге асырылып келеді. Өңірдің әлеуметтік-экономикалық ерекшеліктері ескеріле отырып, І.Жансүгіров атындағы Жетісу университеті базасында Италияның беделді жоғары оқу орны — Marche Polytechnic University филиалы ашылған болатын. Аталған филиал кампусының ресми ашылу салтанаты 2025 жылғы 16 шілдеде Талдықорған қаласында өтті.

— Жобаны іске асырудың маңызды кезеңдерінің бірі ретінде І.Жансүгіров атындағы Жетісу университеті базасында ашылған Marche Polytechnic University филиалы ҚР Әділет министрлігінде 2026 жылғы 2 сәуірде ресми түрде тіркеліп, оның толық заңды мәртебесін растайтын құжат табысталды. Құжатта филиалдың заңды мекенжайы айқындалып, басшысы тағайындалды. Қазір филиалда 31 студент білім алады: бірінші курста — 19, екінші курста — 7, үшінші курста — 5 студент. Оқыту «Агрономия» — «Ауыл шаруашылығы ғылымдары мен технологиялары» бағытындағы бакалавриаттың қос дипломды білім беру бағдарламасы аясында жүзеге асырылады, — делінген хабарламада.

Филиал инфрақұрылымы заманауи талаптарға толық сәйкес келеді. Кампуста Speed breeding орталығы (жылыжай), сондай-ақ төрт заманауи зертхананы қамтитын ғылыми-зерттеу институты жұмыс істейді. Атап айтқанда, өсімдіктерді микроклоналды көбейту, молекулалық генетика және геномика, биотехнология және экология бағыттары бойынша зертханалар қызмет атқарады.

Білім беру үдерісі 3+1 моделі негізінде ұйымдастырылған. Студенттер алғашқы үш жылды Жетісу университетінде оқып, соңғы оқу жылын Италияның Анкона қаласындағы Marche Polytechnic University базасында жалғастырады. Бұл кезеңде олар университеттің заманауи зертханалары мен ғылыми орталықтарында кәсіби құзыреттерін тереңдетеді.

Қос дипломды білім беру бағдарламасын тиімді іске асыру мақсатында 2025 жылғы желтоқсан айынан бастап Жетісу университетінің қолдауымен итальян тілін оқыту курстары ұйымдастырылды. Бұл студенттердің Италияда білім алу барысында пәндерді сапалы меңгеруіне мүмкіндік береді.

Алдағы кезеңде қос дипломды білім беру бағдарламаларын кеңейту жоспарланған. Атап айтқанда, «Экономика» — «Әлемдік экономика және коммерция» (бакалавриат және магистратура), «Ақпараттық технологиялар» — «IT-инженерия» (бакалавриат және магистратура), «Экология» — «Қоршаған ортаны қорғау және орман шаруашылығы» (магистратура) бағыттарын іске қосу көзделеді. Бұл бастамалар Жетісу өңірін дамытудың басым бағыттарына және Қазақстан Республикасының жаңа мамандықтар атласына сәйкес келеді.

Аталған филиалдың қызметі өңірдің ғылыми-білім беру әлеуетін арттыруға, халықаралық академиялық интеграцияны нығайтуға және бәсекеге қабілетті кадрларды даярлауға елеулі үлес қосады деп күтіледі.

Осыған дейін Талдықорғанда қылмыстық топ адамдарға психологиялық қысым жасап, ақша талап еткенін жаздық.