Тамыздағы ҰБТ ға өтінім қабылдау басталды

АСТАНА, 25 шілде – Sputnik. Бүгін тамызда өтетін ұлттық біріңғай тестілеуге өтініш қабылдау басталды, деп хабарлайды Sputnik Қазақстан.

Өтінімдерді қабылдау 5 тамызға дейін жалғасады. Ал тестілеудің өзі 10-15 тамыз аралығында өтеді.

ҰБТ-ға тіркелу Ұлттық тестілеу орталығының app.testcenter.kz сайтында жүргізіледі. Тестілеуге қатысу құны - 5 640 теңге.

Тамыз айындағы ҰБТ-ға қатысатындар:

биылғы және өткен жылғы мектеп және колледж түлектері;

қандастар (Қазақстан азаматы болып табылмайтын ұлты қазақ азаматтар);

шетелде білім алған орта білім беру ұйымдарының бітірушілері;

шығармашылық мамандықтардан басқа мамандықтарға ауысқысы келетін студенттер;

жоғары оқу орындарына шартты түрде қабылданған студенттер қатыса алады.

ҰБТ-ға қатысқан талапкерлер бейіндік пәндер комбинациясын тамыз тестілеуінде өзгерте алады. Ал колледж түлектері оқуға әңгімелесу қорытындысы бойынша қабылданады.

Айта кетері, тамыздағы ҰБТ шекті балл жинай алмаған талапкерлерге тағы бір мүмкіндік беріп отыр. Тестілеуден қайта өтіп, жоғарғы оқу орнына ақылы негізде түсуге болады.